Shiteng miet leit jngoh kynsan u Dy CM bad ka Kurim ïa ka Khyndai Lad

Shillong, Naitung 9 : U Symbud Myntri Rangbah ka jylla uba dei peit ïa ki kam pynroi sor ne Urban Affairs u Ma Sniawbhalang Dhar ryngkat bad la ka Kurim ki la leit jngoh kyndit kyndit ha ka por shiteng miet kumba 12 baje tam ei ei ïa ka Khyndai Lad ha ka Sngi Saitjaiñ 5 tarik Naitung 2025 ban pynthikna da lade ba ka nongbah Shillong ka dei kaba shongsuk bad kaba shngaiñ.
Ka jingleit jngoh ka long da ka jingthmu ban peit ym tang ba katei ka jaka kan shngaiñ hynrei ban ïohi da la ki jong ki khmat ba wat ha ka por shiteng synñia ruh ki nongwan jngohkai ki dang ïa wan bam beit ha katei ka jaka kaba pyni ba kim don a jingsyier hynrei ki shngaiñ haba ki wan sha ka nongbah Shillong.
Ka Khyndai Lad ka dei kawei na ki jaka kaba heh ïew bha ha ka por miet bad ka dei ka jaka kaba khring ïa ki nongwan jngohkai kiba wan sha Shillong.
Ha katei ka jingleit u la ïakren ïa khana, ïadih sha lang bad kiba die jingbam ha Khyndai Lad kynthup ruh ïa kiba wan jngohkai sha kane ka jylla kiba la pynpaw ha u ba ki bang eh ïa ka bam Khasi ha Khyndai Lad. U ma Sniawbha u la mad ruh ïa ki jingbam kiba die ha katei ka jaka.
U la ong ba ka jingdon bun ki briew wat ha ka por shiteng miet ruh ka pynshisha ba ka nongbah Shillong bad ka jylla Meghalaya ki dei kiba shngaiñ na ka bynta ki nongwan jngohkai. U la ïaroh ïa kito ki nongdie, ki riew paidbah bad khamtam ki nongwan jngohkai ba ki ïakmen ïasngewbha lang ïa ka miet ha Khyndai Lad. Kane ka pynpaw ruh ïa ka jingpyrshang jongka sorkar katba lah ban pynneh ïa ka shongsuk shongsaiñ bad jingshngaiñ ha ka jylla.
U la ong ka jingpyrshang jongka sorkar ban pynlong ïa kane ka nongbah bad ka jylla kiba shngaiñ na ka bynta ki nongwan jngohkai ka la rah ïa ka nam bad burom jong ka Meghalaya ha ka map jongka ri India bad ha ka pyrthei hi baroh kawei ha ka liang ka kam jngohkai pyrthei namar kumba ka long mynta ka Meghalaya ka la dei kawei na ki jylla kaba ki nongwan jngohkai na kylleng ka ri bad pyrthei ki la tip bha shaphang jongka bad ki thrang bha ban ïoh wan ïuhkjat hapoh kane ka jylla.