Shitaïew pan por ka KHADC ban bishar ïa ka jaka ba ïeng ka Karkhana saiñ jri ha Mawsmai

Shillong, Naitung, 25: Ka tnat Trade jong ka Khasi Hills Autonomous District Council (KHADC) ha ka sngi Palei ka la pan por shitaiew na ka Hynñiewtrep Youths Council (HYC) ban bishar ïa ki kot ki sla namarba ka jaka ba la tei ïa ka karkhana saiñ jri jong ka Resource Rubber Privte Limited (RRPL) ka dei kaba don hapdeng ka jyrwit jyrwat ha kaba ïadei bad ka jinglong trai ïa kane ka jaka kaba don ha ka shnong Mawsmai, Ribhoi District.
Kane ka jingpan por jong ka tnat Trade ka KHADC ka long hadien ka jingïakynduh jong ki nongïalam ka HYC ba la lamkhmat da u President u Bah Roy Kupar Synrem ïa u Executive Member i/c Trade u Bah Gigur Myrthong.
Dang khyndiat sngi, ka shnat treikam jong ka HYC ka la leit khynra kot khynra sla ha ka karkhana saiñ jri hadien ba ka seng ka la ïoh jingtip ba ka Trading License ba la ai da ka KHADC sha u bar jylla jong kane ka karkhana ka la kut por naduh u bnai Ïaiong, 2024 ïa kaba ym pat shym la pynthymmai haduh mynta.
Ki Pulit ka Ribhoi ki la kem ruh ïa u Bah Donald Rymbai, uba la kam ba u dei u trai jong ka jaka, hadien ba u trai jong ka karkhana u la mudui da ejahar sha ki Pulit halor ka jingkynnoh ba u Bah Donald u la kynshoit ïa ki sengbhalang ban khynra kot khynra sla hapoh ka karkhana.
U Bah Synrem ha ka jingïakren bad ki lad pathai khubor hadien ka jingïakynduh ïa u Executive Member i/c Trade u Bah Gigur Myrthong u la ong, “ïa ka Trading License ka Karkhana kaba la kut noh ha u bnai Ïaiong, 2024 kam shym la pynthymmai shuh haduh mynta. Ka seng ka la phhah ïa ka shnat treikam ban khang tala hynrei ki Pulit ka Ribhoi ki la pynpait ïa ka tala bad aiti biang sha u bar jylla ban pyntreikam ïa ka karkhana.”
“Ban khaïi khlem ka Trading License hapoh u pud jong ka Khasi Hills Autonomous District Council (KHADC) ka long beaiñ namarba ka long pyrshah ïa ka Trading by Non-tribal Regulation 1954 kaba kren shai hapoh ka Section-2 ba kino kino ki briew ki bym dei ki riewlum kiba kwah ban leh ïa ka khaii patneg ki hap ban ïoh Trading Lisen na ka District Council,” la ong u Bah Synrem bad ïathuh ruh ba ha ka jingïakynduh ïa u Executive Member i/c Trade ka seng ka la ïoh jingtip ba ka Resource Rubber Pvt. Ltd kam shym la pynthymmai shuh ïa ka Trading Lisence naduh u bnai basaw hadien ka por ka la kut.
“Ka jingkylli kaba mih mynta ka long kumno une u briew u lah ban pynïaid ïa ka khaii pateng haduh kane ka khyllipmat. Ka District Council ka dei ban pyntreikam ïa la ka jong ka iktiar katkum ba la pynkupbor ha u snem 1954. Ka Section 7 (a) jong ka Trading by Non-tribal Regulation 1954 ka kdew shai ba lada don uno uno u birew ne kano kano ka kompeni kaba ïaleh pyrshah ïa ka kyndon, ka District Council ruh ka don ïa ka bor ban khang tala bad ban kurup ruh ïa ki tiar ki tar kat bym pat lah ban pynthymmai ïa ka Trading License bad katba ym pat lah ban ai ïa ka Trading License,” la ong shuh shuh u Bah Synrem.
Haba ïathuh ba ka jingïakynduh ïa u EM i/c Trade ka long ban pynbor ïa ka KHADC ban leit khang tala noh ïa ka karkhana saiñ jri Resource Rubber Privte Limited (RRPL) u Bah Synrem u la ong, “ngi la kren da kaba shai lada ka District Council kam lah ban pyntreikam katkum ka ikitar ba la pynkupbor kam don jingmut ban don ïa ka KHADC hangne hapoh nongbah Shillong. Kam don jingmut ban don ïa ka District Council ka bym lah ban pyntreikam ïa ki aiñ kiba ma ka hi ka la shna.”
“U EM i/c Trade u la kubur ba ka District Council kan sa leh ïa kaba donkam bad u la pan por na ngi shitaiew ban bishar shwa ïa ki kot ki sla namarba ka don ka jyrwit jyrwat ha kaba ïadei bad ka jinglong trai ïa kane ka jaka bad halor kata ka nongrim ka District Council ruh kam shym la pynthymmai ïa ka Trading License,” u la bynrap.
“Hynrei ngi lakren da kaba shai, ba ngim tip mano ba long trai bad mano bym long trai ïa katei ka jaka, hynrei ka jingsngewkhia jong ngi ka long ba une u briew u treikam ha kane ka jylla jong ngi hapoh u pud u sam jong ka District Council ka long khlem ka Trading Lisense. Ngi la kren da kaba shai ba ha ka jaka ban leit ban khang tala ïa ka RRPL kan bha ruh ïa ngi ban khang tala noh ïa ka District Council ba ym donkam ban buh ophisar bad ban buh tnat treikam namarba kam don jingmut ban don ïa ka District Council haba tang ïa ki aiñ ba ki shna hi ruh kim lah ban pyntreikam,” la byrthen une u nongialam ka HYC.