Khliehriat, Nailar, 16: Ki dkhot jong ka Hynñiewtrep Youth Council (HYC) East Jaiñtia Hills District hapoh ka jingïalam u President u Bah Prios Pale ki la pynphai lut ïa ki katto katne ki briew ki bym biang ïa ki kot ki sla ba la suba ba ki dei ki mynder ri kiba thmu ban rung shapoh ka jylla lyngba ka Check-post kaba don ha ka shnong Ratacherra, East Jaiñtia Hills District.
Ka seng ka la shim ïa kane ka synjam ban khanglad ïa ka jingpyrshang jong ki briew kiba nabar ban rung tuh shapoh ka jylla bad ka seng kan pynlong ïa kane ka jingap shrip ha Ratacherra haduh shitaïew lynter ban peit pyrman ïa ka rung ka mih jong ki briew kiba nabar.
Ka seng ha ka jingkhynra ka la ïatreilang bad ki Pulit kiba ap pahara ha ka Anti-Infiltration Check-posts ha Ratacherra East Jaiñtia Hills District.
Ha ka jingtalasi ïa ki briew kiba nabar la donlang u General Secretary Bah Aeky Lamare, u Vice President Bah Pass Khaii, u Joint Secretary Bah Aite Sana bad ki nongïalam ka HYC Narpuh Circle bad ki nongïalam jong ki Unit.
