Nongpoh, Naiwieng 23: Ka Raid Marngar kaba hap hapoh ka jingpeit jingkhmih jong ka Hima Mylliem, mynta ka sngi ka la pynlong ïa ka Kasi Hangri ka lehniam ot kba jong ka Syiemsad kaba shisien san snem kaba dei ruh ka jinglehniam kaba kyrpang katkum ka riti ka dustur ba lah buh la seng da ki longshuwa manshuwa bad kaba dang pynneh pynsah haduh mynta mynne.
Ïa kane ka jinglehniam la ju pynlong shisien ha ka 5 snem ha ka sngi u Blei jong u bnai Naiwieng kaba dei ka aiom ot kaba ki paidbah ki hiar sha ki pynthor ban ot bad ban lum ban lang ïa u kba bad ïa kane ka jinglehniam lehrukom ka sdang nyngkong eh na iingsad Syiem Raid, bad ki longsan mansan bad sohblei u sohsla ki dei ban don ryngkat bad ki dhulia dhutar jong ka Raid ban pyndep ka suit ka shor hapoh iingsad Syiem bad hadien ba la pyndep ïa ka suid ka shor, kin sa put bd tem ïa ki ksing ki dhah kaba ki khot ka Pordhol bad ei ban put haduh 9 sur sha iing Sad Syiem, hadien ba la dep put la dep tem ka pordhol u Syiem Raid bad u Sohblei kin sa ai hukum ïa ki dhulia dhutar ba ka la dei ka por ban leit ot kba noh.
Dei ha kum kane ka por ba ki khun ki hajar ki hiar sha ki pynthor kba jong ka Syiem Sad ban sdang ïa ka jingot kba bad shuwa ban ai hukum ïa ki paidbah, nyngkong eh dei ban shim bynta shuwa ban ot ïa u kba da u longsan u Pator na ka kur Sylliang bad uwei pat dei na ka Syiem u ta u dei da Sohsla jong ka kur Syiem kine baroh arngut ki dei ban ot khyndai khum (9 muthia), hadien kata pat u Syiem Raid un ai hukum ïa ki paidbah ban ot ia u kba katba ki dhulia dhutar kin bud nadien ryngkat ka ksing ka dhah bad ka put ka tem tynrai.
Ha kane ka rukom lehniam ot kba ki kynthei kin nym lah ban ïa shim bynta kumba la buh da ki longshuwa manshuwa bad ka riti ka dustur hapoh ka Raid, hynrei ki lah ban shu leit peit kai ryngkat ki jingai sngewbha katba kiba sngewbit ban ai.
Haba kren sha ki lad pathai khubor na ka liang u Paiem Richard Syiem, Syiem ka Raid Marngar u la ong ba kane ka jinglehniam Kasi Hangri ka dei shibynta jong ka riti ka dustur ka Raid Marngar ha ka pynthor jong ka Syiem Sad bad ki khun ki hajar baroh ki dei ban mih ryntih ban ot kba bad pyndep tang hapoh shisngi na ka bynta ban bha ban miat ki khun ki hajar, ka ri ka raid, ka it ka hima, bad kham kyrpang eh ïa ka Syiem Sad ban bit ban biang ka sad ka sunon bad ïa kane ka jinglehniam la ju pynlong shisien ha ka 5 snem.
Ha kane ka jinglehniam ka don tang ka suid ka shor hapoh ka iing Sad bad kam don kano kano ka jingpom blang kum ha ka Shad Lukhmi bad kaba kham phylla ka long ba baroh ki khun ki hajar shynrang ki shim bynta shitrhem ban pyndep ïa ka jing ot kba.
