Shiphew snem ki la ïaid naduh ba u Dr.P. Lyngkhoi u la wanrah da ka scaning mashin ha Nongstoiñ

Nongstoiñ, Rymphang 20: Ka jingwanrah jong u Dr. P. Lyngkhoi, Joint Director barim jong ka tnad ka koit ka khiah jong ka sorkar jylla ban peit ïa ki tiar ki tar bad ka mashin ba utei u doktor u pyndonkam ha ka ban peit bniah ïa ki jait jingpang. Utei u doktor haba ïakren bad u nongthohkhubor u la ong ba u la wanrah ïa katei ka mashin naduh u snem arhajar khathynñew bad da ka jingdon jong katei ka mashin la ïoh ban peit bniah ïa kiba bun ki jait jingpang kiba ktah ïa ka jingkoit jingkhiah jong ki nongpang.
Nalor kata u la ong ruh ba ka la long ka jingkyrkhu kaba khraw ïa ki paidbah nongpang na kylleng ki bynta jong ka West Khasi Hills namar haba donkam ban peit bniah ïa ki jait jingpang ki hap ban leit shaduh Shillong bad ka la ktah shibun ha ka jinglut jingsep khamtam ïa kito ki nongpang kiba duk ba kyrduh namar haba leit sha Shillong tang ka bai leit bai wan ka la palat ïa `1000 tyngka nangta sa ka bai scaning ruh ka la ktah bha.
Haba kylli pat ba ïa ka scaning na ka bynta ki nongpang u doktor u hap ban leh hi ne ki don da kiwei pat ki doktor kiba wan ban ïatreilang ha ka Clinic u doktor Lyngkhoi u la ong ba na ka bynta ban leh ïa ka scaning ïa ki nongpang u don da uwei pat u doktor uba ïatreilang uba ju wan na Guwahati shisien manla ka taïew. U la ong ruh, ba utei u doktor uba ïatreilang u dei ruh u nonghikai ha kawei na ki jaka pule jong ki doktor bad u trei ruh ha kawei na ki hospital kiba heh bha ha ka nongbah Delhi.
U doktor Lyngkhoi haba kylli ha kaba ïadei bad ka jing wan jong ki nongpang ban phah peit bniah ha ka jaka sumar jong u naduh ba u la wanrah ïa katei ka mashin u la ong ba naduh ba sdang ka jingwan jong ki nongpang ban phah peit bniah ha katei ka jaka sumar jong u ka long ha man la ka tarik ba u doctor na Guwahati u wan ban ïarap ha katei ka jaka sumar. U la ong ruh ba ha u snem arhajar khatkhyndai ka don ka jingdkoh namar ka jingwan lynshop jong u Covid 19 hynrei hadien ba u Covid u la sangeh ka jingwan jong ki nongpang ka la long biang kumjuh kumba ka long ha kaba sdang. Haba kylli pat ha kaba ïadei bad ki jait jingpang kiba donkam ban leh ïa ka scanning u la ong ba ki don bun jait ki jait jingpang kiba hap ban lap lyngba ka scaning mashin bad ïa ki nongpang kiba don maw ha ki khyllai, u ksang, ki kynja gland kiba at ha ka ryndang bad kiwei kiwei ki dei ki jingpang kiba lah ban lap tang da kaba leh ïa ka scaning ha ka mashin. Haba kylli pat ba haba lap ïa ki jingpang ba don maw ha ki khyllai ha kano ka rukom lah ban sumar. U doctor u la ong ba lada ki maw ha ki khyllai ki dei kiba dang rit lah ban pynkoit tang da kaba dih dawai hynrei lada ki la kham heh la hap ban dril khnang ban pynpra ïa ki maw. Nalor kata u la ong ba ïa u maw uba don ha u ksang yn ym lah satia ban sumar tang da kaba shu dih dawai hynrei hap ban dril. Ha kaba ïadei bad kiwei pat ki jait mashin kiba kham paka na ka bynta ban sumar ïa kiwei pat ki jait jingpang u doctor Lyngkhoi u la ong ba kumba ka long mynta ka dialysis mashin ka dei kaba la donkam haduh katta katta ban don ha Nongstoiñ namar kiba ngat ha ka jingpang stroke bad kiba la jur don ban sumar da katei ka jait mashin bad hab sumar da katei ka mashin ki nongpang ki donkam ban pynbiang arsien ha ka shi taïew bad ki hap ban leit sha Shillong kumta ka ktah haduh katta katta ïa ka jinglut jingsep kumta ban pynduna ïa ka jinglut jong ki nongpang ka la don kam haduh katta katta ba ka sorkar kan pynïoh ka dylysis mashin ha Nongstoiñ Civil Hospital na ka bynta ban pynsuk ïa kiba pang.