Shiphew klur tyngka tam la dep mang pisa ka sorkar ïa ka jingkieng ha Risiang

Nongstoiñ, Nohprah 14: Ka jingpyntrei ïa ka surok two lane na Nongstoiñ sha Maweit haduh mynta ka dang ïaid shait shait, ha kaba watla ym pat lah ban pyndep haduh Maweit ruh, hynrei ka la long ka jingkynkhu kaba khraw ïa ka leit ka wan, ka kit ka bah jong ki paitabah jong katei ka thaiñ.
Ha katei ka surok naduh Nongstoiñ haduh Maweit kaba jngai kumba 36 kilomitar, ki don ar tylli ki wah kiba hap ban kam lyngba ka wah Umïang kaba ïaid lyngba ka shnong Risiang bad ka Wahlyngdoh kaba don ha ka shnong Wahlyngdoh hi. Hynrei, ha ka por ba ka sorkar ka la mang pisa na ka bynta ban shna ïa katei ka surok, ka don ka jingbakla ha ka jingkheiñ jingdiah ha kaba ïa ka jingkieng lyngba ka wah Umïang ka jingmang pisa kaba saw klur tyngka kam shym la rung satia.
Ïa ka jingbym rung jong katei ka mang pisa na ka bynta katei ka jingkieng ha ka jingpynkhreh ban shna ïa katei ka surok, la pynpaw da u bah Methodius Dkhar MLA ka Mawshynrut u ba dei ruh u Myntri ha kane ka sorkar ba mynta u ba la pynpaw ha ka sngi palei jong ba sngi ba plie ïa ka Risiang Sub health centre.
U bah Methodius haba pynshai halor katei ka mat, u la ong ba ha u snem 2023 hadien ba u la shah jied kum u MLA, u la pyrshang ban buddien bad u la lap ba katei ka saw klur tyngka kaba la mang na ka bynta katei ka jingkieng, ka shym la rung satia.
Kumta u la pyrshang katba lah ban pynsngewthuh sha ka sorkar, ba lada kam lah ban mang pisa biang na ka bynta ban shna ïa katei ka jingkieng lyngba ka wah Umïang ha ka shnong Risiang ka jingshna ïa ka surok Nongstoiñ-Maweit, kam don jingmut satia.
Nalor kata u la pynshai ruh ba hadien ka jingkyrpad jong u ka sorkar ka la sngap bad ka la mang pisa kyrpang haduh shiphewklur tam na ka bynta ban shna ïa katei ka jingkieng lyngba ka wah Umïang ha Risiang.
U bah Methodius u la pynshai ruh sha ki paitbah ba ha ka sien kaba nyngkong, ka sorkar ka la mang pisa ban shna ïa katei ka surok arlaiñ tang haduh ka shnong Maweit. Hynrei kum u nongmihkhmat ka thaiñ haba u phai sha kiwei pat ki shnong kiba don kham sha khmat ïa ka shnong Maweit, kum ka Mawmarin, Porkhadoh, Sdadkhar ter ter, u la I donkam haduh katta katta ba kin don noh da ka surok kaba biang na ka bynta ban pynsuk ha ka leit k wan, ka kit ka bah, khamtam eh haba kit ïa kiba pang ba shitom.
Kumta, um shym la shnong kli kti hynrei na ka por sha ka por u la kyntur ïa ka sorkar ba ka dei ban phai khmat lem sha kitei ki thaiñ. Ka sorkar ruh namar ba ka sngew salia ïa ka jingkyntur jong u miet bad sngi, ka la hap ban sngap bad ka la mang pisa ban bteng ïa ka jingpyntrei ïa katei ka surok na Maweit haduh Nongjri kaba hap ha South West Khasi Hills kaba don ha khappud bad ka ri Bangladesh.
U la pynshai ruh ba ha une u snem thymmai ka sorkar kan sa khot tender noh ban pyntrei ïa katei ka surok na Maweit shaduh Nongjri. Nalorkata utei u Myntri sorkar u ba dei ruh u MLA ka thaiñ, u la pynshai ba ha kaba ïadei bad ka jingkoit jingkhiah kum u nongmihkhmat, u la dep pynsngew sha ka sorkar ba kan mang pisa biang na ka bynta ban shna ïa ki jaka sumar hapoh ka constituency jong u.
U la ong ba ka sorkar ruh ka la sngap ha kaba ka la dep mang pisa na ka bynta ban shna sa ar tylli ki jaka sumar ha katei ka thaiñ kawei ha ka shnong Shyrkon bad kawei pat ha ka shnong Mawmarin. U la ong ruh ba shen yn sa sdang noh ban pyntrei ïa kitei ki jaka sumar.