Shillong, Lber 28: Ka National Investigation Agency (NIA) kala shimti mynta ban tohkit sa ïa ka jingbthei bomb Improvised Explosive Device (IED) ha Khyndailad kaba jia ha ka 31 tarik Kyllalyngkot 2022.
“Ka NIA kala shimti ïa ka case halor ka jingpynbthei bomb ha Khyndailad na ka Tnad Pulit. Ka NIA kala register ïa kane ka case ha ka 4 tarik Lber” ong ka tyllong khubor ba ïoh hynne ka sngi nyngkong.
Ka kynhun kiengatiar Hynñiewtrep National Liberation Council (HNLC) kala shim ïa ka jingkitkhlieh halor ka jingpynbthei ïa une u bomb ha Khyndailad.
Ka Tnad Pulit kala ïoh kem ïa uwei u Khynnah uba kam ïalade kum u Area Commander ka HNLC ba khmih ïa ka Shillong Region lem bad phra ngut kiwei pat, kaba jia tang da ki kynta hadien ka jingpynbthei bomb.
Lah ban kdew hangne ba ka NIA kala shimti ruh ban tohkit ïa ka jingpynbthei bomb kaba jia ha ki jaka sah jong ki Nongtrei ka kompani Star Cement, Lumshnong kaba jia ha u snem 2020.
Haduh 7 tylli ki jingjia pynbthei bomb IED kila jia ha Jylla ha kine ki san snem bala leit noh bad kine ki kjynthup ïa artylli ha East Khasi Hills kawei ka Iew Laitumkhrah ba jia ha ka 10 tarik Nailar 2021 bad kawei ka Khyndailad, lai tylli ha East Jaintia Hills ba kynthup ha Krishna Colony Lane ba jia ha ka 12 tarik Nohprah 2020, Iew Soo Kilo ba jia ha ka 26 tarik Naiwieng 2020 bad ha Police Reserve Khliehriat ba jia ha ka 14 tarik Naitung 2021, kawei ka Dawki ba jia ha ka 1 tarik Rymphang 2018 bad ka Sawilgre, East Garo Hils ba jia ha ka 18 tarik Rymphang 2018.
