Shimti ka MCSWA ban buh De-Adiction Center ha Dienchynrum ban sumar ïa kiba kyrni dih drok

Khliehriat, Risaw, 24: Ka ophis u Deputy Commissioner ka East Jaiñtia Hills District ha ka sngi Thohdieng ka la ïasoi ïa ka Memorandum of Understanding (MoU) bad ka ka Mih Myntdu Community Social Welfare Association (MCSWA) na ka bynta ban buh ïa ka De-Adiction Center ha ka shnong Diengshynrum.
Kane ka Centre kan long ruh kum ka Rehabilitation Centre na ka bynta ki briew kiba la im kyrni ha u drok hynrei kiba angnud ban ïoh ïa ka jingsumar ha kane ka Center ha East Jaiñtia Hills District.
Ïa ka MoU la ïasoi da ka Director jong ka MCSWA ka Dr J. N. Shulai da ka jingsakhi lang u Deputy Commissioner ka East Jaiñtia Hills District u Shivansh Awasthi, ka MLA jong ka Sunga -Saipung Constituency ka Kong Santa Mary Shylla, ki Waheh Shnong, ki nongïalam jong ka Seng Longkmie, VDP bad ki nongïalam jong ki Seng Samla Shnong na ki shnong bapher bapher ka East Jaiñtia Hills District.
Haba kren ha ka jingïalang, u Shivansh Awasthi u la ong ba ki Dorbar Shnong, ka VDP, ki Pulit bad ki bor synshar district ki kwah ban wanrah ïa ka shongsuk shongsaiñ bad ka jingeh ka long ha kaba ïadei bad u drok namar haba ïoh kem ïa kiba pyndonkam ïa u drok ym don pat ka jaka ban ai jingsumar bad ban ai jingïasyllok namarba ym don ki De-Adiction Centre hapoh ka District
“Ngi la kyrpad ïa ka Mih Myntdu Community Social Welfare Association ban shimti ïa ka kam namar ngi la don lypa ïa ka ïing ha Deingshynrum kaba la tei na ka skim DMF bad mynta ïa ka ïing la nang shna pynbha shuh shuh ban pynlong ïa kane kum ka Rehabilitation Center ha kaba kiba kwah jingsumar kim donkam shuh ban leit sha kiwei pat ki Rehabilitation Centre kiba don shabar ka jylla hynrei ki lah ban leit sumar ha kane ka Center,” la ong u Deputy Commissioner.
U la ong ruh ba ki bor synshar district ki la ai tang ïa ka ïing sha ka MCSWA ha kaba ym donkam ban siew bai wai eiei bad ka Association kan pynïaid ïa ki kam ki jam ha ka Center.
Ha kaba ïadei bad ka jingïaid pahara ki dkhot ka VDP, u Shivansh Awasthi u la kyntu ba ki dei ban long kiba phikr bha haba ki ïaid pahara ha ka por mynmiet, ban peit thuh bha ïa ki jait briew, ban nang ruh kumno ban kren ïa ki briew kiba ïaid ba ieng khamtam ki briew kiba nabar ba kin pyni ïa ka jinglong kaba bha.
U Chief Functioning jong ka MCSWA u Bah Aris Nongkynrih u la ai khublei ïa ki bor synshar district kiba la aiti ïa ka ïing ha Dienchynrum ban pynlong kum ka De- Adiction Center na ka bynta ki shynrang da ka jingïarap jong u Deputy Commissioner uba la shim ïa ka jingkitkhlieh ban shna pynbha ïa ka ïing kum ka Rehabilitation Center.
Hapoh ka Centre yn sa bud ïa ki kyndon jong ka Drug Reduction, Elimination and Action Mission (DREAM) ba la wanrah da ka Sorkar Jylla da kaba buh ïa ka Detox Center ban pynïaid da ka tnat ka Koit ka Khiah, ka Family Counselling, ka Rehabilitation Centre ban sumar ïa kiba la im kyrni ha u drok, bad ban leh ruh ïa ka Family Base Follow-up khnang ban wanrah biang ïa kiba la im kyrni ha u drok sha ka imlang ka sahlang.
Ka jinglut jingsep kan long kaba bun bha ha kaba ka MCSWA ka hap buh ïa ki doctor, ki nurse, ki Psychiatrist, Psychologist, ban pynbiang ïa ka bam, ka jaka sah bad kiwei kiwei ki jingdonkam. ïa mynta ka MCSWA kam pat ïoh ïa kano kano ka jingïarap bad kiba leit shah sumar kin hap ban siew pisa bad ka MCSWA kan sa pyrshang ban ïoh ïa ki lad jingïarap na ka DREAM, na ka Ministry of Social Justice and Empowerment, ka Sorkar India bad na ki Corporate Social Responsibilty (CSR) bapher bapher bad lada ïoh ïa kine jingïarap ka jingsiew bai sumar ruh kan hiar dor.
U la ïathuh ruh ba mynta ka NGO ka la don ïa ki nongtrei bad yn sa nang thep kam shuh shuh ïa kiba na ka thaiñ.
Ka Technical Team kan sa leit shah hikai pyntbit ha u bnai Naiwieng ha ka National Institue of Social Defence (NISD) kaba don ha Delhi, kaba dei ka shlem ai jinghikai ïa baroh ki Institute kiba don ha ri India bad la khmihlynti ba kane ka jingïatreilang kan long kaba seisoh khnang ba yn lah ban rat dyngkhong ïa u drok.
U Bah Aris u la ïathuh ruh ba ka MCSWA ka la ïakren ruh bad u Waheh Shnong ka Dienchynrum ha kaba ïadei bad ka jingbuh ïa ka De-Adiction Center bad ha kaba ïadei bad ka NOC na ka Dorbar Shnong.
Ka Kong Santa Mary Shylla, haba kren ha kane ka jingïalang ka la ïaroh ïa ki Waheh Shnong, ki VDP, ki Pulit kiba ju trei shitom ban pynbha ïa ka imlang ka sahlang bad ka la ai khublei ruh ïa ka MCSWA ka ban sa shimti ïa ka De-Adiction Center.
Ka Additional Deputy Commissioner jong ka East Jaiñtia Hills District ka Kong J.U.Kharpuri ka la ong ba kane ka jingïalang kan pynkyndit bynriew ban sngewthuh ha kaba ïadei bad ki briew kiba la ngop ha u drok bad kumjuh ïa ki kynthei kiba ïaid nuti khang ban dup lah ban ai jingïarap ïa ki tang lada ki rejistar ïalade kum ki sex workers.
Ka la kyntu ïa ki nongpynïaid shnong, ïa ki VDP, ki Seng Kynthei bad ki Seng Samla ba ki dei ban tip shwa ïa ki aiñ ki kyndon kiba wan na ka ïingbishar Supreme Court bad ka High Court jong ka jylla khnang ba kano kano ka kam kaba ki leh ba kin nym poi sha kaba leh bakla.
Ha kane ka sngi la ai jingkren ruh na ka Deputy Chief Legal Aid Councel ka Kong K.Chalam, u Additional Superintendent of Police u Bah S.Paslein bad kiwei kiwei.