Shimti ka Dr. Wa I Sa Sumer kum ka District Chief Commissioner, Bharat Scouts & Guides, WJH

Jowai, Naiwieng 26 : Ki bor pynïaid ka Meghalaya Bharat Scouts & Guides, West Jaiñtia Hills District ha kane ka 26 tarik u Naiwieng kila pynlong ïa ka prokram ban pynskhem ‘Induction Ceremony’ ïa ka Dr. Wa I Sa Sumer, District School Education Officer, WJHD ka ban shimti noh ïa ka kam District Chief Commissioner, Bharat Scouts & Guide hapoh ka West Jaiñtia Hills.
Ïa ka jingïalang la pynlong ha ophis treikam ka DSEO, West Jaiñtia Hills, bala pynïaid da ka Emidaka Lyngdoh, District Organising Commissioner (G), MBS&G-WJH, haka jingdonlang u Richard B Uriah, Vice-President, MBS&G, la ïoh ruh ka jingkren lamkhmat da ka C.D. Laloo, District Commissioner Guides, MBS&G-WJH, ka jingkren shaphang ka Scouts-Guides Movement daka Saramai Tariang, Vice-President, MBS&G-WJH, katba u Adiam u Bthuh, District Secretary, MBS&G-WJH ula ai ki kyntien ai khublei.
Katkum ka rukom treikam ka Scouts-Guides Movement ïa ka jingpynskhem dkhot ïa ka Dr. Wa I Sa Sumer, DSEO, West Jaiñtia Hills la pyndep daka Siami Shylla ka District Training Commissioner, Guides, MBS&G-WJH.
Ka Dr. Wa I Sa Sumer, kaba dei ruh ka DSO bad DCC, MBS&G, West Jaiñtia Hills haka jingkren kala pynpaw ka jingsngewkmen ban ïadon bynta lang bad ka Scouts-Guides Movement kaba long ka seng kaba trei haka nongrim ka bha ka miat jong ki khynnah bad ïa ki samla kiba don haki jaka pule.
Kala pynsngew ruh shaphang ka Motto jong ka Movement kaba ong “Be Prepare” kaba mut ban long kiba la pynkhreh ha kano kano ka por. Ka kyrmen skhem ba ka jingdon bynta lang jong ka bad kane ka Movement kum kawei na ki nongïalam yn sa lah ban kyntiew shuh shuh ïa ka Scouts-Guides haka rukom treikam kaba khambha.
Shi bynta na ka sngi kyrpang jong ka ‘Constitutional Day’ ka Dr. Wa I Sa Sumer kala ïalam ban pule lang ïaka Preamble jong ka Indian Constitution da ka jingïashim bynta da baroh ki dkhot.