Shimti ka Dr Mehtab ïa ka shuki hapoh ka Ïingdorbar thaw aiñ ha ka sien kaba nyngkong

Shillong, Nailur 08: Ka Nongthaw aiñ ba dang shu shah jied na Gambegre ka Dr Mehtab Chandee A Sangma, kaba dei ka kurim u Myntri Rangbah Conrad K Sangma, ha ka sngi Nyngkong ka la shimti ïa ka shuki hapoh ka Ïingdorbar Thaw Aiñ, ha ka sngi sdang jong ka Dorbar Synrai.
Haba iakren bad ki lad pathai khubor ka la ong, “Ka dei ka kabu bad ka burom ban mihkhmat ïa ka constuency jong nga.”
Kum ka dkhot thymmai ka Ïingdorbar, ka la ong ba ka dang pule ïa ka rukom pynïaid bad rukom treikam jong ka Ïingdorbar. Ka thmu ban peit thuh bad ïoh jingshemphang ha shuwa ba kan ïashimbynta shitrhem ha ki kam ha Ïingdorbar.
“Mynta nga don shibun kiei kiei ban tip. Ngan peit shuwa ïa ka rukom pynïaid bad nga tharai ngan peit thuh shuwa hashuwa ba ngan ïashim bynta ha ki jingïakren,” bynrap ka Dr Mehtab.
Halor ka mat ka jingmihkhmat ki kynthei ha ka saiñ pyrthei, ka la ong, “Hooid, ngi la ïohi ba ka jingmih khmat ki kynthei ha ka saiñ pyrthei ka long kaba duna bha bad nga sngew burom haduh katta katta mynta hangne ba kum ka kynthei bada ban don ha kane ka Ïingdorbar bad nga kyrmen ba ka jingdon jong nga hangne, bun ki kynthei kin ïoh mynsiem ban wan sha ka jylli jong ka saiñ pyrthei”.
Ka Dr Mehtab ka la shah jied kum ka MLA ha ka elekshon shiteng samoi ba long ha u Naiwieng 2024, da kaba jingïoh haduh 12,678 vote pyrshah ïa ka nongïakhun pyrshah ba hakhmat eh, ka Sadhiarani Sangma jong ka Trinamool Congress, kaba liem da 4594 vote.
Lah ban pynkynmaw ba ka shuki MLA ka Gambegre kala lait thylli hadien ka jingiehnoh kam u Saleng A Sangma, u MLA ba lai samoi, hadien ba u la shah jied noh kum u MP ka Lok Sabha na Tura Constituency.
Ka jingjop ka Dr Mehtab ka dei ka jingjop ba kongsan ïa ka National People’s Party (NPP), kaba la kiew ïa ka jingdon paid ha Ïingdorbar sha ka 32 ngut.