Khliehriat jylliew 27: U Bah Lektor Dkhar uba na ka shnong Khliehmyntriang, East Jaiñtia Hills u la pynpaw ka jingaikhublei ïa ka sorkar Meghalaya kaba la shim khia ïa ka jingkyrpad ban buh ïa ka Food Corporation Of India (FCI) Depot ha East Jaiñtia Hills District.
Halor katei ka jingkyrpad, u Bah Lektor Dkhar ha kine ki khyndiat sngi u la leit ïakynduh ïa u Myntri ba dei peit ïa ka Food Civil Supplies & Consumer Affair u Bah Commingone Ymbon ha kaba u Myntri u la ai da ka jingthoh ba dei ban buh noh ïa ka FCI Depots ha East Jaiñtia Hills bad mynta ka sorkar jylla lyngba u Saloni Verma, IAS u ba dei u Director jong ka tnat Food Civil Supplies Consumer Affairs Meghalaya Shillong la phah jingthoh sha ka General Manager Food Corporation of India Regional Office Meghalaya ba dei ban shna noh ïa kane ka FCI Depots ha East Jaiñtia Hills District bad la ai copy ruh sha u Bah Lektor Dkhar bad sha u Under Secretary jong ka jylla Meghalaya Food Civil Supplies & Consumer Affairs Department, sha u Deputy Commissioner ka East Jaiñtia Hills District.
“Kumba ka long mynta, ha East Jaiñtia Hills ym don ka jaka ba biang ban buh ïa ki marbam jong ka FCI bad kane ka buh jingeh bha ha ka liang ka jingpynpoi marbam. Ka jingbym don ka jaka buh mar ha ka thaiñ ka pynlong ba ki mar ba kongsan hap wanrah bad pynpoi na ki jaka kiba jngai bad kane ka pynlong ba slem ban sam ïa ki mar bam bad wanrah ïa ka jingkiew dor ha ka leit ka wan, ha kajuh ka por, ka ktah ïa ka ïoh ka kot ki paidbah bad ka don ka jingbuh dor ïa ki marbam bad kiwei kiwei ki jingdonkam hapoh ka rukom sam marbam sha ki paidbah ha ka imlang ka sahlang, kumta ka jingbuh ïa ka FCI depot ha East Jaiñtia Hills kan ai shibun jingmyntoi,” ong u Bah L. Dkhar.
“Ka distrik jong ngi, kaba la nangroi ha ka jingbun briew bad ka dei ka jaka kaba hajan bad ka Assam kumta ka long kaba biang bha na ka bynta kum kine ki jingtei. Lada don ka FCI Depots ha East Jaiñtia Hills District kan ïarap shibun ha kaba kyrshan ïa ka bha ka miat bad ka roi ka par jong ka thaiñ, kumta nga ai ka jingïaroh ïa ka sorkar jylla lyngba ka jingshim khia ban sdang noh ïa kane ka project ha kine ki sngi ban wan, ka sorkar kam dei ban shim sting ïa kane ka kam bad ka dei ban shim khia ïa ban leh noh kham kloi ïa ka jingdonkam,” bynrap u Bah Dkhar.
