Jowai, Nailur 08: Kum shibynta jong ka training ïa ki samla ka thain Satpator haka kam shet jingshet, ka SURE ka shimkhia ruh ha kaba kumno ban nang pynbha ïa ka jingbam tynrai. Kane ka training kan long na ka bynta 17 sngi bad ki jait jinghikai kiba yn sa ai ha kane ka training ki dei, ka rukom shet ïa ki jingbam Indian, ki jingbam Chinese bad ki jingbam tynrai.
Haka 6 tarik u Nailur la pynlong ïa ka jinghikai kaba kyrpang tang ha kaba kumno ban pynitynnad (glamorization) ïa ka jingbam tynrai. Ki nongwanshah training kiba wan na ki shnong bapher bapher jong kane thaiñ Satpator kila wan rah ïa ki jinbam tynrai ba ki pynkhreh bad la ïarap pynitynnad ïa kine ki jingbam kiba kila shet da u Chef Lambhah Kma. Ïa kane ka jingshet bad jingpynitynnad ïa ki jingbam tynrai la pyndep da nongwan shim training kiba la bynta ha ki group kiba pher bapher.
U Chef Lambhah Kma u ong ba ka jingbam tynrai ki jong ngi kila long lypa kiba don pura ïa ki bynta ba tei met, kaba sah ka long satang ban ngin pynitynnad ïa kine ki jingbam. Ula ong ruh ba ka jaidbynriew jong ngi ka riewspah bha ha ki jingbam tynrai kiba bunsien ki dei kiba la shet da ki jhur ne ki soh kiba ïoh na ki khlaw (wild edible). Ka jingkyrmen ka jong u ka long ba ki dukan die jadoh kin sdang ban shimkhia ha kaba kumno ba kin pynitynnad ne pynibang ïa ki jingbam kiba ki die.
Ka Ilasiewdor Gashnga kaba long ka Program Coordinator Skill Training jong ka SURE ka ong ba wat la ïalade ka dei ka War hynrei haba ka peit ïa ki jingbam kiba ki nongwan shim training kila wan ban pyninam ha kane ka sngi, ki dang bun kiba ïalade ruh im tip ne im ju ïohi. Ki katto katne jait ki jingbam tynrai kiba la shet da ki nongwan shah training ki dei ka jyntah Sohslung, ka jyntah Tham, u Soh sten, Sohlkhein, u Pron, Jia jekeng, Jia herew, jia Sohlewi, Jia Lekedung, Jia Chan, jia sohlachit, Chiah koi, bad Sohrma. Ha kaba ïa dei ba ki jait kpu pat kila wanrah da u tewe puri bad u twew resai.
Ka kong Ilasiewdor ila ong ruh ba ka long kaba itynnad ban ïohi ba ki samla ki sngewsarong ban pynimaw ïala ki jong ki jingbam tynrai.
Lah ban ong ba wat tang hapdeng ki shnong kiba don ha ka thaiñ War Jaiñtia ruh, ka jingbam tynrai ki Nongtalang ka lah ban don ka jingïapher bad ka jong ki thaiñ Padu, Satpator ne Amwi. Ka kong Ilasiew kala ong ba kane hi ka pyni shaphang ka jingriewspah ka bam tynrai jong kane ka thaiñ.
Kham haswha ïa kane la ïoh ïa ka jingai jinghikai shaphang ki jingbam ba kongsan kiba tei met da ka kong Pasqualina Lamare kawei na ki staff jong ka SURE bad la ïoh ruh ïa ka jingkren na u ma Lambormi Suchen, Skill Development Officer West Jaiñtia Hills District. U ma Suchen ula ïaroh ïa ka SURE ba kala lah ban pynïaid ïa kane ka training. U ma Suchen ula kyntu ruh ïa ki samla ba kin pyndep ïa ka training bad ban sdang leh eiei hala ki jong shnong ki jong ki.
Ki nongshim training kiba la wan ïashim bynta ha kane ka training ki dei ki samla na ka shnong ba marjan kum na Amlari, Jong u chen, Amjalong, Nongtalang nalor ki shnong kiba hap hapoh ka Syndai kum ka Syndai kmai Shnong, Syndai Mission bad Syndai Lyngkot.
