Nongpoh, Naitung 07: Haba kren hakhmat ki dkhot ka seng, kata ha ka sngi ba la long ka jingialang ban pynskhem ia ki nongkitkam ba thymmai ka FKJGP Umling Circle, u Bah Lumlang Mawnai, Senior Vice-president ka FKJGP ha Ri Bhoi, u la kyntu ia ki dkhot ka seng ba ki dei ban shimkhia, na bynta ban tehlakam halor ka jingjyllei ki samla kiba la ngop ha ka jingdih Drok.
U Bah Lumlang Mawnai, kum u nongialam ka FKJGP, u la ong ba lada peit mynta, la ima bad isynei shisha halor ka jongbun ki samla kiba la ngop ha ki jingdih Drok bad uba la pynpaw ruh halor ka jingdon ki samla kiba la ngop ha ki jingdih Drok, ka la jur eh kata naduh Umling ter ter shaduh Byrnihat, ha kaba ka la wanrah ruh ia ka jingma kaba khraw eh ia ka thain bad khamtam eh ia ka jaidbynriew hi baroh kawei.
Lyngba katei ka jingkren, utei u nongialam ka FKJGP, u la kyntu ia ki dkhot ka seng ba ki dei ban shimkhia bha halor katei ka phang bad kata ka long naduh ba kumno kin kren ne pynsngewthuh ia kito ki samla kiba la ngop ha ki jingdih Drok bad ba kin ialam ia ki sha ka lynti kaba dei.
Ha kawei ka bynta, u la buh ruh ka jingkyrpad ia ka sorkar bad khamtam ka tnad Pulit ba kin shim khia lem ha kaba ia khun thma pyrshah ia ka jingkynrei u drok bad kum ka seng ruh kan ai ka jngiatrei lang na ka bynta ban pynduhjaid ia une u jingdih ba sniew, uba la pynjot ia bun ki samla ba lui lui ha ka dong ka thain bad ha ka jylla hi baroh kawei.
