Shimbynta ki nongpynïaid Meghalaya College ha ka National Conference ha New Delhi

Mawkyrwat, Nohprah 22 : Ki nongpynïaid kolej na ka jylla Meghalaya, kiba dei ki dkhot jong ka Indian College Forum, ki la ïashimbynta ha ka jingïalang kaba 26th National Conference jong ka Indian College Forum (ICF) kaba la long ha India International Centre, 40 Max Mueller Marg New Delhi, naduh ka 19 haduh ka 21 tarik Nohprah, 2025.
Ha kane ka kynhun, kiba dei na Meghalaya ki kynthup ïa u Dr. K.K. Nongsiej, Principal ka Sngap Syiem College, Mawkyrwat; u Dr. C. Massar, Principal barim ka Lady Keane College, Shillong; u Dr B. Tron, Principal jong ka PGT; u Dr. A.M. Shangpliang u Principal ka Lady Keane College; U Dr P. Nongtdu, Principal ka Jaintia Eastern College; bad ka Kong C. Laloo, kaba dei ka Principal jong ka Kolej Presbyterian Mawlai.
Kane ka jingïalang ka la pynleit jingmut ha ki phang, “Ki jingeh ha kaba pyntreikam ïa ka NEP 2020 bad ka jingktah jong ka Artificial Intelligence bad ka jingkylla ka suiñbneng ha ki jaka pule ba kham halor”, ne “Challenges of Implementation of NEP 2020 and Impact of Artificial Intelligence and Climate Change on Institutions of Higher Education.” Ïa kane la pynlong da ka Indian College Forum ha ryngkat ka jingïatreilang bad ka Society of Education and Economic Development (SEED), ryngkat ka jingkyrshan na ka KAWA Group of Institutions, Jammu & Kashmir.
Ha kane ka jingïalang ki la ai jingkren ha kane ka jingïalang ki briew kiba pawnam kiba kynthup ïa ka Prof Aarti Shrivastava (NIEPA), u Dr Malti Goel (Climate Change Research Institute, India), bad u Prof N.V. Varghese (Vice Chancellor, IIT Mumbai). La ai kumba 15 tylli ki kot wad bniah halor ki mat ba kongsan ha ka jingpule kaba kham shalor.
Ki nongpynïaid na ki kolej ha kylleng ka ri ki la ïashimbynta ha kane ka jingïalang bad ki jingïakren ki la pynpaw ïa ki jingeh ba ki jaka pule ba kham heh ki ïakynduh, khamtam eh ki kolej kiba don ha nongkyndong bad ki kolej kiba bei tyngka hi da lade bad ki la pynksan ïa ka jingdonkam ban ïatreilang, ka jingpynïaid kaba paka bad ka jingkyrshan jong ka sorkar ban pynkhlaiñ ïa kane ka bynta. Ka Conference ka la pdiang bad mynjur ïa ka rai ban bishar bniah ïa ki jingeh bad ki jingeh ba ki HEIs ha India ki ïakynduh bad donkam ïa ka jingïarap jong ka polisi lyngba ka tnad pule puthi jong ka sorkar India.
Hapdeng kane, ka jingïalang ka la ai jingmut ïa baroh ki HEIs ban buh bad pynkhlaiñ ïa ka Research Cell ha la ki jong ki jaka pule.
Ïa kane ka kaiphod la pynkhreh da u Dr. K.K Nongsiej uba long u Secretary ka ICF Meghalaya bad u National Executive Member jong ka Indian College Forum.