Shillong, K’Lyngkot 25 : U Lat ka Jylla u CH Vijayashankar u la kyntu ïa ki samla ka jylla ba kim mih shakhmat da ka jingkitkhlieh ban shim bynta ha ki elekshon bad pyndep hok ïa ka kamram jong ki kum ki nongshong shnong ha ka riti synshar paidbah ban jied nongmihkhmat da kaba bat ruh ïa ki kyndon ka jingïalong mar kumjuh, ka jinglong kawei bad ka hok.
Ïa kane u Lat u la kren ha ka jingrakhe jong ka Jylla ïa ka National Voter’s Day kaba long ha kane ka sngi u Blei ha Durbar Hall, Lok Bhavan, Shillong hapoh ka jingpeit jong ka Election Department jong ka sorkar jylla.
U Lat u la pynkynmaw ruh ïa ka lynti ïaid jong u kum u nongmihkhmat da kaba kdew ruh ïa ka jingitynnad jong ka riti synshar paidbah kaba la ïalam ïa u haduh ba un ïoh ïa ka kabu ban shakri ïa ki paidbah ka Meghalaya.
Ha shwa kane, u Lat la sam ruh ïa ki khusnam sha ki nongjop ha ka Democracy Run bud pat sa ka jingshim ïa ka jingsmai (Voters’ Pledge) ban pyntikna ïa ka jingsnohkti lang jong baroh na kabynta ban pynneh pynsah ïa ka riti synshar khadar kaba laitluid.
Katba na ka liang u Dr. BDR Tiwari, IAS ba dei uh u Chief Electoral Officer, Meghalaya, ha ka jingkren maitphang u la kdew ïa ka jingkongsan jong ka National Voters’ Day na ka bynta ban pynkhlain ïa ka jingpynsngewthuh ïa ka jingkordor ka jingshim bynta paidbah ha ka elekshon jied nongmihkhmat.
La pynshongkun ïa ka jingïalang da ka jingpyni ïa ka jingriewspah ka kolshor jong ka jylla nalor ka jingkren na ki rangbah na ki party bapher bapher kynthup na u Bah Arnold Lanong, Working President, Shillong City District Executive Committee (NPP), bad Kong Priambada Blah, President, East Khasi Hills District, BJP, Meghalaya Pradesh, kiba la banjur halor ka kamram jong ki samla bad ki nongshong shnong ban pynneh pynsah bad pynkhlain ïa ka riti synshar paidbah khamtam haba ïadei bad ka kam jied nongmihkhmat.
Na ka liang u Chief Secretary ka jylla Dr. Shakil P Ahammed u la kdew ïa ka jingkongsan ka jingshim bynta ha ka jingthep vote na ka bynta ban ïoh ïa ka synshar khadar paidbah kaba khlain.
La donlang ruh ha kane ka sngi da ki heh sorkar, ki nongmihkhmat na ki party, ki samla pule ki nongmihkhmat na ki samla bad ki nongshong shnong ka jylla.
Ka jingrakhe ha kane ka sngi ka sdang da ka Voter’s Day Marathon ïa kaba la kaweh lama da u Lat ka jylla na khyrdop jong ka Iing sah u Lat.
