Shimbynta bun ngut ki khynnah ha ka jingpynlong ka ophis DSO-EJHD ïa ka National Sports Day

Khliehriat, Nailar 30: Ka ophis jong ka District Sports Officer East Jaiñtia Hills District, myn ha ka 29 tarik bad 30 tarik u nailar ka la pynlong ka ïa jingrakhe ïa ka National Sports Day lane ka National Wide Celebration of Sports, spirit and Unity, ka 29 tarik u nailar ka dei ruh ka sngi kaba ka ri baroh kawei ka kynmaw kyrpang ïa ka sngi kha jong uwei u khlur ialehkai hockey u Major Dhyan Chand bad ha kaba kum kane ka sngi la ju pynlong ïa ka prokram ba kyrpang ha ka ri baroh kawei, ïa kane ka lympung ialehkai sports la pynkut pat mynta ka sngi ka 30 tarik nailar ha madan football ha Diengshynrum.
Ha Kane ka lympung la ïa wan bun ngut ki khynnah kiba kynthup ruh ki khynnah kiba dang rit kiba na graas root bad ki khynnah kiba na Ephphatha Society.
Ha ka prokram ba la pynlong mynta ka sngi u myntri ka sorkar jylla, uba dei ruh u MLA jong ka Khliehriat, u bah Kyrmen Shylla u la long kum u kogngsan bad la ïa don ryngkat lang ruh u S.D.O Sadar East Jaiñtia Hills District, u Manish Kumar, IAS, ka District Sports Officer East Jaiñtia Hills District, ka kong Stefani Rapsang, ki nongkitkam bad ki dkhot jong ka East Jaintia Hills Sports Association, u bah E.S. Sapuh uba dei u President jong ka Ephphatha Society na East Jaiñtia Hills District.
Haba kren kum u kongsan, u bah Kyrmen Shylla u la ai mynsiem, u la pynshlur ïa ki samla bad ki khynnah ba kin don ka jingbuh thong bad poi sha ki rynsan kiba sha jrong, u la kyntu ruh ba kin long kiba treishitom ha ka jingialehkai sports jong ki ban wanrah ïa ka nam ka burom jong ka district, ka jylla bad ka ri hi baroh kawei, ha kajuh ka por u la ai ruh ka jingkitbok kitrwiang ïa baroh kiba la wan ban iashimbynta ha kane ka lympung ba kin nang kiew shaphrang ha ki jingilehkai sports jong ki.
Ïa ki khynnah kiba dang rit ruh u la ai mynsiem ïa ki ba kin nang kiew shaphrang ha ka jingialehkai sports bad khmihlynti ruh ba kin sa nang ioh lad shuh shuh ban pynpaw pyrthei ïa la ki sap ki phong jong ki ha ki jingialehkai sports.
U Manish Kumar, IAS, u la kren halor kane ka sngi ba ka dei ka sngi ba kynmaw burom ïa ka sngikha jong u khlur ialehkai hocky na India, u Major Dhyan Chand, u la ong ba um dei tang u khlur ialehkai hynrei u long ruh kum ka nongmuna ne ka nuksa ïa kiwei ruh ban long kiba treishitom bad kiba don ka jingmut kaba skhem ban ïakhun ban poi sha ka thong “Ka jingialehkai sports kam dei tang ka jingialehkai hynrei ka ai jinghikai ruh kumno ban treishitom, ban shimkhia ha ka kam sports” u la ai khublei ïa baroh ki nongialehkai spots kiba wan shimbynta ha kine ki ar sngi lynter, u ai khublei ïa ki kmie ki kpa, ki nonghikai, ïa ka District Sports Officer bad ong ba ka dei ka jingïatreilang hi kaba lah ban pynurlong ïa kane ka prokram bad khmihlynti ban kin mih shuh shuh shibun ki khlur ialehkai sports na kane ka district.
Ka DSO, ka kong S.Rapsang ka la ai ka jingiaroh ïa ka jinglong la kloi jong u bah Kyrmen Shylla uba ju don ka mynsiem ïatreilang ha kaba u la nohsyniang da ki lak tyngka ha kaba kyntiew ïa ka sports hapoh ka district, ka la ong ruh ba u bah Kyrmen Shylla u dei u briew uba sngewrit bad uba don ka mynsiem ban iarap bad bynrap shuh shuh da kaba ong ba kum kine ki briew ka long kham ñiar ban shem.
Ki jait jingïalehkai sport ba la pynlong ha kine ki ar sngi ki kynthup ka jingiamareh marathon kaba 10 kilo mitar, ka football kaba san ngut shiliang, ka maw point, ïa tan tyllai, ka Race kaba 50 mitar bad 100 mitar, ka volleyball bad ka Khelo India ba la ïashimbynta da ka Rymbai Khelo India centres bad ka Khelo India Sein Raij.
Na ka liang ki shynrang, kiba la jop ha ka jingiamreh marathoh ki kynthup u samla Knerlang Phawa uba la ioh ba nyngkong bad ioh khur ruh ïa ka song pisa kaba T7000 tyngka, u Rishanmiki Ryngkhlem, u la long ba ar bad khur ïa ka song pisa kaba T5000 tyngka bad u Sting Phawa uba long ba lai bad khur ïa ka song pisa kaba T3000 tyngka.
Na ka liang ki kynthei, kiba la jop ha ka jingiamreh marathoh ki kynthup ka Phyrnai Kyndiat kaba long ba nyngkong bad khur ïa ka song pisa kaba T7000 tyngka, ka Dani Kyndiat ka la long ba ar bad khur ïa ka song pisa kaba T5000 tyngka bad ka Useful Kyndiat ka la long ba lai bad khur ïa ka song pisa kaba T3000 tyngka.
La sam ïa ki trophy sha kiba jop ha ki jingïalehkai sports bapher bapher bad la sam ruh ïa ki jingai sngewbha sha baroh kiba la wan ban ïashimbynta ha kane ka lympung ïalehkai sports.