Shilong, Naiwieng 25: Ka Meghalaya Human Rights Commission (MHRC) ka la shim suo motu case pyrshah ïa ka Shillong Civil Hospital namar ka jingjia shah tynrah kali ki arngut ki samla pule ha NEHU dang shen.
Ïa kane ka mukotduma la shim halor ka khubor ba mih ha kawei ka kot khubor ba kynnoh ba ki bahaïing hasem bad ki samla pule kila kynnoh ba ki nongtrei ka Civil Hospital, kila kheiñ sting ban ai jingsumar ïa kine ki samla pule ba mynsaw haduh ba iwei ila phlei snam haduh jan dap kynta.
Namar kane, ïa kine ki samla pule la pynkynriah noh sha Nazareth Hospital. Ka Commission ka la phah notice sha ka Director of Health Services (MI) ka Sorkar Jylla, ba bthah ba kan pynlong mardor ïa ka jingtohkit bad ban aiti ïa ka kaiphod jingtohkit sha ka Commission ha lane shuwa ka 7 tarik Kyllalyngkot 2026.
Ka dei ha ka 17 tarik Naiwieng, arngut ki samla pule ka Department of Chemistry ka skulbah NEHU, ka samla Daritngen Pohdukhei bad ka samla Stephanie Shadap ki la shah rat ha ka kali katba ki dang ïaid lynti ha phyllaw jong ka NEHU ban mih sha Gate No 2.
Kane ka kali kaba dei ka Maruti Car la niah da u Security Guard uba trei sha NEIGRIHMS hynrei uba sah ha barrack ka kompani kaba don ha NEHU.
Ki Pulit kila pynngat case ïa une u nongñiah ka kali hapoh ki kyndon ba thmu ban shim ïa ka jingim briew. Ha ka jingtohkit, ki Pulit kila shem ba une u nongñiah ka kali ula don hapdeng ka jingbuaid kyiad.
