Shim Sou Moto ka MSCW ba shah pynïap ka samla ha Williamnagar

Shillong, Naitung 19: Ka Meghalaya State Commission for Women (MSCW) ka la shim suo motu halor ka jingshah pynïap jong kawei ka samla kynthei ba dang 19snem ka rta ha Williamnagar, bad ong ruh ba kan buddien hi da lade ïa ka jingtohkit.
Ha u kyrwoh ba la phah ha ka sngi Saitjaiñ, ka Chairperson jong ka Commission ka Kong Ïamon Syiem ka la ong, ba kan ‘tuklar,’ lada donkam, ban pynthikna ba ki bahaiing hasem jong ka lanot kin ïoh ïa ki jingkyrshan ba donkam bad ki jingïarap.
Ka MSCW kan “ïatreilang bad ki tnat treikam ka Sorkar ban pynkhlaiñ ïa ka jingïada bad ki lad ba khlaiñ kiba khanglad ïa ka jingshah thombor ki khynnah bad ki kynthei ha ka thaiñ.”
Haba pynrem jur ïa ka jingjia, ka MSCW ka la ong ba ka kyndit haduh katta katta halor ka jingshah pynïap jong ka samla kynthei ha Williamnagar.
“Ngi sngewsih jur ïa ka jingmad jingeh da ka lanot ba la shah pynïap bad ngi pynpaw ïa ka jingsngewlem sha ki bahaïing hasem jong ka. Kum kine ki kam thombor kiba shyrkhei ki long ki bym lah ban pdiang bad ki pyni ïa ka jingshah thombor beit beit ïa ki jinglong briew bad ka hok ba ka imlang sahlang jong ngi ka pynskhem,” ong ka Chairperson jong ka MSCW.
Ka MSCW ka kyntu ïa ki Pulit ka jylla ban kham shimkhia ïa ka jingtohkit khnang ban pynthikna ïa ka jingtohkit kaba khuid ba suba bad ban ai jingtip manla ka por sha ki paidbah.
“Ngi kyntu ïa ki bor shnong, ki sengbhalang bad ïa ki nongshong shnong kiba don ka jingsngewkhia ban ïatreilang bad ki tnad tohkit ban pynthikna ïa ka jingpynïoh kham kloi ïa ka hok,” la kdew ka kyrwoh.
Ki Pulit ha ka sngi Thohdieng ki la ong ba u nongshah kynnoh, u James R Sangma, u dei uba don jingïadei bad ka lanot.
La thaw ïa ka kynhun ba kyrpang hapoh ka jingïalam jong u Addl. SP ka Williamnagar ba la ïarap da u Dy.SP (HQ & Crime) bad kiwei kiwei ki ophisar ban buddien bad ban ïoh kem kham kloi ïa uba donkti ha kane ka jingjia.