Shim nuksa na ka Phan Nonglait ban ïakhun pyrshah ïa ki kam thombor ïa ki kynthei: DC

Mairang, Nailur 1: Kum shibynta jong ka jingleh burom ïa ki riew shlur ïaleh laitluid ka ri ha ka jingrakhe jong ka ri India ïa ka Azadi Ka Amrit Mahotsav, ka North East Zone Cultural Centre (NEZCC), Dimapur kaba long ka shnat treikam jong ka tnat pynneh riti ka sorkar India, ha ryngkat ka jingïatreilang bad ka tnat pynneh riti jong ka sorkar jylla Meghalaya, ka la pynlong hynne ka janmiet ïa ka prokram ïa kaba la ai kyrteng “Ka Phan Nonglait”-Tribute to Unsung Heroes’, kaba long ka prokram lyngba ki sur ieid ri, ki jingshad tynrai bad ka drama. Kane ka prokram la pynlong ha shnong Nongrmai, Eastern West Khasi Hills District kaba long ka shnong, ha kaba la pun la kha bad la pynheh pynsan ïa ka riewshlur ïaleh laitluid ka ri, Ka Phan Nonglait.
Ha kane ka prokram, u Deputy Commissioner jong ka Eastern West Khasi Hills District, u Bah W.Nongsiej u la leit kum u kongsan, ha ka jingdon ryngkat jong u Syiem ka Hima Nongkhlaw, u Pa’iem P.M Syiemlieh, u Myntri ka Hima Nongkhlaw, u Bah Boldness L Nongum, I Assistant Director ka tnat pynneh riti ka sorkar jylla, I Kong D. Kharjana, kiwei kiwei pat ki ophisar sorkar, u ‘Riewsaid aiñ jong ka Ïing Bishar Ba Hakhlieh Duh ka Ri India u ba long ruh u nongthoh jong ka kot “Ka Phan Nonglait- A Lady Freedom Fighter of India”, u Bah Daniel Stone Lyngdoh Nonglait, u Sordar ka shnong Nongrmai, u Bah S.Nongrang, ki dkhot jong ka kur Lyngdoh Nonglait, ki khynnah pule bad ki paidbah ka thaiñ.
Ha ka jingkren ka jong u kum u kongsan ha kane ka prokram, u Deputy Commissioner ka Eastern West Khasi Hills District, u Bah W. Nongsiej, u la kren halor ka histori jong ka jinglong jingim jong ka Phan Nonglait bad ki kam ba khraw ba ka la leh ha ka jingïaleh laitluid pyrshah ïa ka sorkar phareng.
U la pynpaw ruh halor ka jingshimkhia jong ka halor ka jingshah thombor jong ki kynthei khynnah bad u la kyntu ruh ïa baroh kiba la sakhi ïa kane ka prokram, ba kin ring jingmut na ki kam shlur jong Ka Phan Nonglait, da kaba pynneh pynsah ïa la ka riti dustur bad ban ieng pyrshah ruh ïa kino kino ki kam thombor pyrshah ïa ki riew kynthei.
Ha kane ka prokram la ïoh ban sakhi ïa ki jingrwai ieid ri bad ki jingshad tynrai na ki riew donsap bapher bapher ka Eastern West Khasi Hills District bad na kito kiba la wan na ka nongbah Shillong ruh kumjuh.
La pyniphuh iphieng bad pynshongkhia shuh shuh ïa kane ka prokram kynmaw burom ïa Ka Phan Nonglait, da ka drama halor ka jingim bad jingïakhun jong kane ka riewshlur ïaleh laitluid, da I Kong Lapdiang Syiem bad ka kynhun jong I.
Kiwei kiwei pat kiba la kren ha kane ka sngi ki kynthup ïa I Assistant Director ka tnat pynneh riti ka jylla, I Kong D. Kharjana, u ‘Riewsaid aiñ ka Ïingbishar Ba Hakhlieh Duh ka Ri India u ba long ruh u nongthoh jong ka kot ïa kaba la ai kyrteng “Ka Phan Nonglait-A Lady Freedom Fighter of India”, u Bah Daniel Stone Lyngdoh Nonglait, u Sordar ka shnong Nongrmai, u Bah S. Nongrang bad uwei na ki dkhot jong ka kur Lyngdoh Nonglait, u Bah Marshall Lyngdoh Nonglait.