Shim khia KSU Nongthymmai halor ka jingujor jrongkti i longkmie Khasi, shah kem u ba donkti

Shillong, Naitung : Ka Khasi Students’ Union (KSU) Nongthymmai Circle ha ka 6 tarik mynta u bnai ka la leit sha ka Thanat Rynjah (Police Station), Shillong ban kyntu jur bad ban shim khia halor ka ejahar bala ujor da i longkmie Khasi ha ka ba ïadei bad ka jingshah jrongkti jong i ha uwei u bar jylla uba la leh khlemakor ha ka por ba i dang shong taxi.
Ha katei ka jingleit buh jingujor, na ka liang ka Seng KSU Nongthymmai Circle la ïalam da u Samla Richard Mawkhiew, Vice President bad u samla Ribang Sing Nongrum, General Secretary ha ryngkat ka jingïadon lang na ka liang ki ba haïing hasem jong i tei i longkmie ba shah jrongkti.
Kumta hadien katei ka jingujor na ka liang ki pulit ka Rynjah PS wut wut ki lah pynlong ka jingthwet bad ki lah ïoh ban kem noh mardor ïa utei u barjylla uba la leh ïa katei ki kam pohjait wat hapdeng ki jaka paidbah.“
Halor katei ka jingjia na ka liang ka Seng KSU Nongthymmai Circle ka la pynrem jur ïa katei ka jingleh pohjait jong utei u barjylla, bad ka seng ka la kynduh ruh ïa u officer incharge ka Rynjah Police Station ban kyntu jur ba ki bor ka aiñ ki dei ban pynshitom da kaba tyngeh khnang ba kan ym mih shuh kum katei ka jingjia hadien habud ïa kiwei pat khamtam ki kynthei ki khynnah haba ki mih ban leit shane shatai.
Khatduh, Ka Seng ka maham tyngeh ïa kiwei ruh ba kim dei ban jrong kti ïa ki kynthei, ki khynnah bad lada ka Seng ka ïoh jingtip kan pynshitom da kaba tyngeh. Shuh shuh halor ka kyrwoh ka Khasi Students’ Union (KSU) Nongthymmai Circle ka pynpaw ba kan ïai buddien ïa kane ka kam haduh ba utei u barjylla un ïoh ïa ka jingshah pynshitom ka ba tyngeh.