Shim khia bad pynshlur u MLA ïa ki longkmie ban wan sha ki jaka sumar naduh ba pun haduh ba kha

Shillong, Nohprah 3 : Hadien ba dang bteng ka jingiap ki khyllung bad ki kmie ha ka por ba pun ba kha hapoh ka Mawkynrew Constituency, na ka liang u MLA katei ka Constituency u bah Banteidor Lyngdoh u la lum ïa ka jingïalang naduh ka jingïadon ryngkat ka Deputy Commissioner (DC) East Khasi Hills Kong R.M Kurbah, ki Doktor, BDO, ki Nongsynshar Shnong, ki Nongïalam Niam, ki longkmie ki riew rangbah ban bishar bniah halor ka jinglong jingman ka koit ka khiah khamtam jong ki khyllung khynnah bad ki longkmie kiba pun ba kha hapoh ka Mawkynrew Constituency baroh kawei.
Haba kren ha kane ka jingïalang na ka liang u MLA u la ong “ Nga sngewkhia jur ba tad haduh mynta ka dang don beit ka jingiap jong ki khyllung khynnah bad ki longkmie kiba pun ba kha hapoh ka Mawkynrew Constituency. Kumta nga da kyntu jur bad pynshlur ïa ki longkmie kiba pun ba kha ban shim khia ban leit sha ki jaka ai jingsumar ba kin ïoh ïa ka jingsumar kaba paka khamtam ïa ki dawai vitamin, ki injekshon ïa ki khyllung ba kin lait na ki jingpang ba har rukom. Hooid ym lah ban len ki dang don hi ki longkmie kiba dang kha ïa ki khun ha la ïing hynrei ïa kine ruh nga kyntu jur ba lada don kano kano ka jingsngewpher ne ipher ïa i khyllung ne wat ïa lade ruh dei ban leit mar mar sha ki jaka sumar kata sha ki PHC ne ki Hospital”.
U la banjur ruh ba donkam ban don ki prokram ban pynsngewthuh sha ki paidbah ïa ka jingkordor jong ka jingsumar ban ioh ia ka jingkoit jingkhia. Kumta u la ong ba donkam ban pynlong ïa ki prokram ban pynsngewthuh ïa ki paidbah ha man la ki shnong ki thaw hapoh ka constituency.
U la ai khublei ruh ïa ki ASHA, ïa ki Doktor, ki Nurse kiba shim khia ban ai jingsumar ïa kito kiba wan wad jingsumar na PHC. Khamtam ïa ki ASHA Kiba kloi ban bud dien ïa ki longkmie ba pun ba kha sha ki ïing ki sem ban pynsngewthuh bad ïarap ruh ïa ki kumno ba kin ïoh ïa ki jingbam kiba tei ïa ka met ha ka por ba ki dang pun bad haduh ba kin sa kha ruh.
Na ka liang ka DC ka la ban jur ïa ki paid ka Mawkynrew Constituency ba kim dei satia ban khang khyrdep ïa ki PHC kumba la jia dang shen tang namar bym don doktor. Namar haba don kiba shitom bad wan sha ki PHC lada don tang ki Nurse ruh ki la ïoh ban ai jingsumar ïa kiba donkam ka jingsumar kyrkieh.
Hapoh ka Mawkynrew Constituency baroh kawei ki don 90 tylli ki shnong, ki PHC ki don 3 tylli, ki Sub Centre ki don 10 tylli. Ka jingiap ki kmie ha ka por ba pun lada ïa nujor ha u snem 2024-25 ki don 2 ngut mynta u 2025-26 kiba iap ki long 3 ngut kumta ka don ka jingkiew. Ki khyllung ha u 2024-25 kiba iap ki long 61 ngut ha u 2025-26 kiba iap ki long 34 ngut kaba pynpaw ka dang bun hi kiba iap. Ki khynnah kiba iap hapdeng ka rta 1-5 snem ha u 2024-25 ki long 12 ngut bad ha u 2025-26 ki long 4 ngut kaba pynpaw ka jingiap ka dang jia hi.
Dei halor kane ka kaiphod ba la pynlong ïa kane ka jingïalang ban bishar bniah ia ka jinglong ka koit ka khiah ha baroh ka Constituency. ïa kane ka jingïalang la pynïaid da I Dr AJU Kharduid DMHO. Kiba la ai jingkren ki long Dr S Rymbai Block Medical Officer, Dr E.L Kharmutee DMCHO, DC Kong R.M Kurbah bad ïa ka jingkren ai khublei la ai da u BDO bah G Dhar MCS.