Shim jingkitkhlieh ka HNLC ba don jingthmu pynbthei bomb IED ha ïew Umsning, Ri Bhoi District

Shillong, Risaw 13: Ka seng ba la shah kheiñ beaiñ ka Hynñiewtrep National Liberation Council (HNLC), ha ka sngi Nyngkong ka la shim ïa ka jingkitkhlieh bad jingkam kaba pura halor ka jingthmu pynbthei bomb Improvised Explosive Device (IED) ha ïew Umsning, Ri-Bhoi District.
Katkum ka kyrwoh ba la pyllait ha ka sngi Nyngkong, u General Secretary ka HNLC Bah Sainkupar Nongtraw ula ong ba kane ka kam ka dei kaba leh kum ka “dak ka jingpyrshah” pyrshah ïa ka jingïai bteng ban shet kylla ïa ka Jaidbynriew da ki riewsaiñ pyrthei bamsap bad ki nongkhaïi hehspah kiba ai jaka sah bad pynkupbor ïa ki bar jylla ha ka jingduhnong ki briew ka jylla.
Haba ïadei bad kane ka Seng ka la kynnoh ruh ïa ki riewsaiñ pyrthei kiba ai jaka sah ïa ki bar jylla, kiba pynsuk ïa ka jingdie jaka bad kyrshan ïa ka bha ka miat ki briew ba nabar bad buh jingma pat ïa ka lawei jong ka Hynñiewtrep.
U Bah Nongtraw u la ong, “Ngi pynmih ïa kane ka kyrwoh ban pynkynmaw ïa baroh ki Nongmihkhmat paidbah ba mynta bad kiba rim ba ka jingshaniah jong ka Jaidbynriew kam dei ka kabu ban ïadie ne khaïi. Ka kamram jong man ki nongïalam ka long ban ïada ïa ka khyndew ka shyiap, ka spah mariang, bad ka snap kyrteng ki briew jong ngi ym ban ïapeiñ ïa ki na ka bynta ka myntoi shimet ne myntoi saiñ pyrthei.”
U la bynrap ruh da kaba ong, “Ngi la peit bniah da ka jingsngewkhia kaba jur ba ki katto katne ki briew hapoh ka kam saiñ pyrthei ki dang ïai bteng ban pyndonkam bakla ïa ka kyrdan jong ki da kaba ai jaka sah ïa ki nongshong shnong ki bym dei ki riewlum, pynsuk ïa ka jingpynkylla jaka, bad kyrshan ïa ki jingmyntoi nabar kiba buh jingma ïa ka lawei jong u Hynñiewtrep.”
U nongïalam ka HNLC ula ong, “Ka Jaidbynriew ka la ïakynduh ïa ka jingma kaba khraw bad ba dang ïai bteng, ki riew saiñ pyrthei bamsap kiba die ïa ka khyndew ka shyiap jong ngi, ki marpoh khyndew, bad ka jinglong kyrpang jong ngi na ka bynta ka jingkyrshan nabar. Kum kine ki jingshet kylla kim dei satia tang ba ki pheil hynrei ki dei ki kam shet shukor pyrshah ïa ki briew bad ki kpa tymmen jong ngi.”
U Bah Nongtraw ula pyntip ba ka HNLC ka la buh ïa u Bomb IED hakhmat ka ïingsah u Myntri barim ka Jylla Bah Nehlang Lyngdoh.
Ka HNLC ka la maham ba kan sa thad madan bad ïaleh pyrshah ïa kito kiba ïasuhbuit bad ki bar jylla, haba pynpaw ba ka bor synshar khadar ka dei ban suhthied ha ka mon jong ki paidbah, ym na ka bynta ban ïarap ïa ki briew ba nabar.
Halor kane ka Seng ka la kam ruh ba ka don ïa ki bor shipai kaba lah ban ïaleh pyrshah ïa ki riewsaiñ pyrthei ba arsap, kam pher la ki dei kiba bat ïa ka bor ne ym bat.
“Ha u 2004, tang shitaïew shuwa ka jingpynbthei bomb ha Them Metor, ngi la buh ïa u bomb IED ha ka SP ophis ha Shillong, bad ieh khlem pynbthei ïa u. Ka Tnad Pulit ka la jied ban buhrieh ïa kane ka jingjia, namar ka jingsngew lehraiñ jong ki, watla ngi la trei ïa ki kam ha ki jaka bym kham rung kham mih ki briew, ngi dang pyni ïa ka jinglah ban ïohrung bad buh ïa u bomb. Ha u 2021, ngi la leh kumjuh ha Khlieh Police Reserve, kaba lam sha ka jingïap hapdeng ki Pulit. Sa shisien, ki bor khmih ki la jied ban buhrieh ïa ka jingshisha na u paidbah,” ula ong.
U la pynkut da kaba ong, “Kane ka dei ka jingpynkynmaw kaba khatduh ba ka bor synshar ka dei ban don tynrai ha ka mon jong ki paidbah, ym ha ka liang jong ki briew kiba nabar. Kito kiba dang ïai bteng ban leh pyrshah ïa ki jingmyntoi jong ka Jaidbynriew kin duh noh ïa ka hok ban kam ïa ka jinglong nongïalam hapdeng ki briew jong ngi, bad ka HNLC ka don ïa ka bor shipai ban ïakhun pyrshah ïa kine ki riewsaiñ pyrthei ba arsap, kam pher ki bat ïa ka bor ne kim bat.”