Nongpoh, Nohprah 22 : Ban pdiang burom da ka jingkhuid jingsuba ïa ka Khristmas kaba dei ka jingwan longbriew u khun u Blei sha kane ka sla pyrthei bad kumjuh ruh ïa u snem thymmai 2026, ki nongshong shnong jong ki 20 tylli ki shnong ba hap ha ka thaiñ Byrnihat mynta ka sngi ki la pynlong da ka jingpynkhuid shnong paidbah ba la shim bynta shitrhem da ki paidbah nongshong shnong.
Ha kane ka jingpynkhuid shnong kitei ki 20 tylli ki shnong la wan ban shim bynta ruh da u Bah Sosthenes Sohtun Myntri sorkar ba dei peit ïa tnad C&RD ba dei ruh u MLA ka Jirang kum u kongsan bad la sakhi lang ruh da ka jingdon lang u Abhilash Baranwal, Deputy Commissioner ka Ri Bhoi, u Bah Kendrowell Lapang Chairman ka Synjuk ki Rangbah Shnong Byrnihat Area, ki nongïalam shnong, ryngkat ki longkmie ki longkpa bad ki khun samla.
Ha kane ka jingpynkhuid shnong paidbah la snoh kti lang ruh da ka ophis u BDO ka Umling C&RD Block bad ka Green Tech Foundation, kaba dei kawei na ka seng treimon sngewbha kaba ju peit ju khmih na ka bynta ka khuid ka suba bad ïada mariang hapoh ka jylla.
