Shim bynta u Lamphang ha ka 68th Common Wealth Parliamentary Conference ha Barbados

Shillong, Risaw 11: U Lamphang ka Ïingdorbar Thaw aiñ ka jylla u Thomas A. Sangma, u la ïashim bynta ha ka 68th Commonwealth Parliamentary Association (CPA) Conference, kaba la sdang naduh ka 5 tarik mynta u bnai, 2025, ha Bridgetown, ka nongbah jong ka Barbados.
Ïa u Sangma la synranlang da u Malthus S. Sangma, Secretary, Meghalaya Legislative Assembly; u Bah Aurelius Warlarpih, Officer on Special Duty (OSD) jong u Lamphang; u Bah Daman D. K. Rymmai, Deputy Secretary (R) bad u Bah Dilip Syiemiong, Personal Assistant jong u Lamphang.
Kane ka Common wealth Parliamentary Conference (CPC) kaba neh shi taïew, kan kutnoh ha ka 12 tarik mynta u bnai, ha kaba la wan ban shim bynta da kumba 600 ngut ki nongmihkhmat na ki 180 tylli ki ri, ki jylla bad provincial legislature na kylleng ka Commonwealth. Ïa kane ka jingïalang la pynlong da ka Parliament of Barbados bad ka CPA Barbados Branch, kaba la long halor ka phang, “The Common wealth – A Global Partner.”
Ki nongmihkhmat na ka ri India sha ka 68th CPC la ïalam da u Lamphang ka ïingdorbar Thaw aiñ ka Lok Sabha u Om Birla, bad ba kynthup ïa u Deputy Chairman ka Rajya Sabha u Harivansh Narayan, ha ryngkat lang bad ki 36 ngut ki Presiding Officer na ki 24 tylli ki jylla bad ki Union Territory Legislature na kylleng ka ri India.
Kane ka jingïalang ka long kum ka rynsan na ka bynta ki lad ïakren ha ki kam thaw aiñ, kiba kdew ruh halor ki lad jingïatreilang bad ka jingïasam ïa ki jingai jingmut hapdeng ki ri Common wealth. Ha baroh kane ka jingïalang, ki la don kumba 7 tylli ki workshop kiba dei halor ki kam synshar khaddar bad kiwei kiwei.
Ka jingthmu jong kane ka CPA Conference ka long ban pynkhlaiñ ïa ki lad synshar paidbah, ban kyntiew ïa ka synshar khaddar kaba bha, bad ka pynshlur ïa ki jingïakren ban pynbeit ïa ki jingeh kiba mad da ki ri ka pyrthei. Ka thmu ruh ban wanrah ki lad pynroi kiba neh lyngba ki jingïatreilang bad ka jingsam ïa ki jingai jingmut kiba bha.