Shillong, Nailar 24 : Ki nongïalam ka Liang Pyrshah ha Garo Hills Autonomous District Council (GHADC) hapoh ka jingïalam jong u Dr.Mukul Sangma ba dei ruh u Myntri Rangbah barim ka Jylla, ha ka sngi U Blei ki la leit ban shim bynta ha ka jingïa duwai lang na ka bynta ka synshar khadar kaba bha ha ka Council.
Ïa kane ka jingïaduwai la pynlong da ka kynhun ki nongïalam niam na Tura ha District Auditorium Tura, West Garo Hills district.
Ha kane ka jingïaduwai lang la wan ban shim bynta da bun bha ki nongïalam bad ki paidbah da ka jingsngew ban ïa pynsawa lang ïa ka sur na ka bynta ka jingshai bad ka lawei kaba don jingkyrmen ha ka thaiñ.
Na ka liang u Dr.Mukul Sangma ryngkat ki MDC bad ki riew rangbah ki la shim bynta shitrhem ha katei ka jingduwai ban pan ka jingkyrkhu na ka bynta ban ïoh ïa ka synshar khadar kaba khuid kaba suba ha ka jingtreikam jong ka GHADC bad ruh ban pyntikna ba kan trei na ka bynta ka bha ka miat bad ka imlang sahlang jong ki paidbah.
Lah ban kdew hangne ba ka GHADC ka sakhi ïa ka jingtyrkhong kaba jur ha ka pla tyngka kaba la pynlong ïa ki nongtrei jong ka Council ban duh tulop da ki phew phew bnai.
