Nongstoiñ, Nailar 1: Ka West Khasi Hills District unit jong ka Nehru Yuwa Kendra, Sangathan (Ministry of Youth Affairs and Sports, Govt. Of India) mynta ka sngi ka 1 tarik Nailar 2023, ka la pynlong ïa ka District level ‘Yuwa Utsav’ halor ka phang ‘PANCH PRAN’ ha St Francis D’ Assisi College, Siejlieh Nongstoiñ ha kaba bun ngut ki khynnah samla pule napoh ki skul bad kolej kiba don napoh jong ka District ki la wan ban ïa shim bynta ha kane ka prokram.
Ka ‘PANCH PRAN’ ka don san tylli ki thong kiba kongsan bad kita ki long, ka thong ban pynroi ïa ka Ri India, ban weng noh ïa ka jingmut jingpyrkhat jong ka jingsynshar phareng, ban sngew sarong ïa la ka jong ka nongkynti kaba la hiar pateng, ka jingïalong shi tylli bad ka jingïatreilang bad ban pyndep la ka kamram kum ki nongshong shnong ka Ri India.
U Bah H.K. Thabah, I/c Deputy Commissioner, West Khasi Hills, District u la long u Kongsan ha kane ka prokram, ha ka jingïa don rynkatlang jong u Bah S.Nongsiej u ba la mih khmat na ka liang jong ka ophis U BDO, Nongstoiñ, u Bah D. Rapsang Officer Incharge NYKS Nongstoiñ, Br. C.Wanniang, Principal jong ka St Francis D’ Assisi College, Siejlieh Nongstoiñ, ki nongtrei sorkar na ki tnat kiba pher, ki nonghikai skul bad kolej bad kiwei kiwei.
Haba kren ha kane ka prokram, u Kongsan, u la kyntu jur ïa ki khynnah samla jong ka thaiñ, ba kin ïa shim bynta man ka por, la ha kino kino ki prokram kiba la pynlong da ka NYK ne da kiwei pat ki tnat sorkar, khnang ba ïa ki sap ki phong jong ki, yn ithuh bad sakhi ym tang hapoh District hynrei wat shaduh ka jylla, ka ri bad ka pyrthei hi baroh kawei.
Ka jingïakop pynisap ka long ha ki san bynta kata, ka Young Artists talent Hunt (Dro Jingdro), Young Writers Talent Hunt (Thoh Poetry), Photography Talent Hunt, Declamation Talent Hunt and Cultural Festivals (Ka Jingïathong da ka Kynhun) ha kaba ki nongjop napoh ka District Level kin leit ïa shim bynta sha ka State level.
U Bah D. Rapsang, Officer-Incharge, NYKS Nongstoiñ, u la ai ka jingkren plie bad kren pynkut ïa kane ka prokram ha kane ka sngi, ha kaba u la ai khublei kitbok kit rwiang ïa baroh kiba samla kiba la wan ïashimbynta ha kane ka prokram.
