Nongpoh, Nailur 27: Ka College of Agriculture (CoA), Kyrdemkulai, Meghalaya ka la ïashim bynta ha ka jingïalang lyngba ka live telecast ban sakhi ïa ka jingplie paidbah ïa ki building thymmai ban sah ki khynnah pule shynrang bad kynthei (Boys’ & Girls’ Hostels) ryngkat bad ki Academic bad Administrative Blocks ha ka College of Horticulture (CoH), Bermiok, ha ka 25 tarik u bnai Nailur 2025.
Ïa kane ka prokram ban plie thymmai ïa ki building la shim bynta da u Shri Om Prakash Mathur, U Lat ka jylla Sikkim, uba la long ruh kum u Kongsan ha katei ka sngi. Ha kane ka prokram la don ruh ki shongknor badonburom ki ba la ïa shim bynta kum u Shri Shivraj Singh Chouhan, myntri sorkar pdeng jong ka tnat Agriculture & Farmers’ Welfare bad myntri jong ka Rural Development, sorkar India, ryngkat bad u Dr. Mangi Lal Jat, Director General, ICAR, New Delhi bad u Dr. Rajbir Singh, Deputy Director General (Agricultural Extension), ICAR, New Delhi.
Ha kane ka jingïalang la ïadonlang ruh u Shri Bhagirath Choudhary, myntri jong ka sorkar pdeng na ka tnad Agriculture & Farmers’ Welfare; u Shri Puran Kumar Gurung, myntri jong ka tnat Agriculture, ka sorkar Sikkim; u Shri B.S. Panth, MLA, Temi-Namphing; u Dr. G. Kadirvel, Director, ICAR-ATARI, Zone VI, Guwahati bad u Dr. A.K. Pandey, Dean, CoH, Bermiok. Ki nonghikai, samla pule bad ki paidbah nongshong shnong ki la ïashim bynta ban pynlong ïa katei ka sngi kaba kmen bad ba shongkun.
Ha College of Agriculture, CAU(I), Kyrdemkulai, Meghalaya, ïa katei ka prokram la sakhi ïa katei ka live telecast da ka jingdon lang da u Dean, Prof. Ram Singh, ryngkat ki nonghikai, ki nongtrei bad ki samla pule kaba long kum ka dak ka jingïasnoh kti lang ha ka liang ka pule puthi bad ban ai jingkyrshan ïa ka CoH, Bermiok. Kane ka jingïalang ka la pynpaw shai ïa ka jingtrei shitom jong ka CAU ban kyntiew bad pynkhlain ïa ka pule puthi bad ban plie lad ïa ka jingroi bad ki lad pule kiba kham heh na ka bynta ki samla pule jong ka thaiñ shateilam mihngi.
