Shim bynta ki skul ha ka Painting, Essay bad Extempore Speech ba pynlong ka ophis u DPO
Mawkyrwat, Jylliew 04: Kum shibynta jong ka jingrakhe ïa sngi pynneh pynsah ïa ka mei mariang ne ka World Environment Day 2025 halor ka phangpdeng, “Ending Plastic Pollution Globally”, ka ophis jong u District Planning Office (DPO), South West Khasi Hills District kaba hapoh jong ka Chief Ministers Youth for Green Campaign Movement ka la ïoh ban pynlong ïa ka program ba la tip kum ka ‘Inter-School Competition’ hapoh ka Multipurpose Hall jong ka DC’s Laitlawsang, South West Khasi Hills District.
Ha kane ka ‘Inter-School Competition’ ne ka jingïakop na ka liang ka ophis ka la ïoh ban pynlong ïa ki lai tylli ki prokram ba kyrpang kiba don ka jingïadei bad ka jingpynneh pynsah ïa ka mei mariang kata ha ka Painting Competition, ka Essay Competition bad ka Extempore Speech Competition ha kaba la wan ïashimbynta da ki 10 tylli ki skul.
Lah ban kdew ba ka jingïashimbynta jong ki khynnah ki long ha ka jingïakop ha ka Painting Competition ki don 17 ngut ki khynnah skul, ha ka Essay Competition ki don 15 ngut ki khynnah skul bad ha ka Extempore Speech Competition ki don 8 ngut ki khynnah skul.
U bah F.B. Basan, MCS, District Planning Officer jong ka South West Khasi Hills District uba long kum u kongsan, ha ka jingkren jong u u la ai mynsiem na ka bynta ki khynnah skul ba kim dei ban don ka jinglehraiñ, ka jingtieng ne jingartatien haba ki ïashimbynta ha kum kine ki jait prokram namar lada ki long ha kane ka rukom kan nym lah ban pynpoi ïa ki sha ka thong hynrei ki dei ban don ka mynsiem jong ka jingshlur, trei shitom bad long kiba la pynkhreh bha khnang ba kin lah ban poi sha ka thong kaba ki ki la thmu.
Ym tang kata, u la ai ai jingmut ruh ïa ki nonghikai ba kim dei ban shu ai ha ki tang ïa ka jingstad lyngba ki kot pule hapoh ki skul hynrei ki dei ruh ban da buh ïa ki prokram kiba pher bapher kum ki jingïakop ha ki jingïatai nia lane jingkren muk-mak khnang ba kin sngewthuh kumba ban don ka mynsiem jong ka jingïakhun ne jingïaleh lyngba ka jingpynkhreh jong ki ha ki bynta ba ki ki don ban ïakhun.
Kiwei de kiba ïadonlang ki long naduh u bah O.L. Passah, Superintendent jong ka Fisheries, South West Khasi Hills District, u bah D. Syngkon, District Sports Officer, South West Khasi Hills District, ki nongtrei hapoh ka Planning Department lem ruh ki nonghikai skul.