Nongstoiñ, Jylliew 13: Ka ophis jong ka District School Education Officer, West Khasi Hills District ha ryngkat ka jingïatreilang bad ka ophis jong ka District Mission Coordinator, SSA, West Khasi Hills District, hynne ka sngi ki la ïoh ban pynlong ïa ka prokram Jan Bhagidari halor ka phang “Ensuring Foundational Literacy and Numeracy Especially In Blended Learning”.
Kane ka prokram la pynlong ha Vanni Hall, St. Peter’s Higher Secondary School, Pyndengrei, Nongstoiñ ha kaba I Additional Deputy Commissioner ka West Khasi Hills District, I Kong D. Blah I la long I Kongsan, ha ka jingïadon ryngkat jong I Joiñt Director of School Education and Literacy & District Mission Coordinator, SSA West Khasi Hills District, I Kong. R. Kongwang, I District School Education Officer, West Khasi Hills District, I Kong L. Syiemlieh, kiwei kiwei pat ki nongtrei sorkar, ki nonghikai bad ki khynnah skul.
Ha ka jingkren kum I kongsan ha kane ka sngi, I Additional Deputy Commissioner ka West Khasi Hills District, I Kong D. Blah I la ong ba ki prokram kiba kum ka Jan Bhagidari, ki pynïoh ha ki nonghikai bad ki khynnah pule ïa ka rynsan ban ïatai bad ïasam jingmut.
Shuh shuh I la ong ba ka pule puthi ka dei ban pynsngew tynnad ïa ki khynnah pule bad kim dei ban don kano kano ka jingtieng ne jingartatien ha ka pule puthi kaba man ka sngi ka jong ki.
Haba kren shaphang ki nonghikai, I Kong Blah I la ong ruh ba dei lyngba ka jinghikai ka jong ki, ba ki khynnah pule ki sngewthuh ïa ka bor bad ka dor jong ka pule puthi. I la kyntu ruh ïa ki nonghikai ba kin trei shitom khnang ban pynduna ïa ka jingpep skul shiteng por jong ki khynnah skul.
Ki dei ban btin lynti ïa la ki khynnah skul ba kin shim jinghikai ruh na kiwei pat ki bynta jong ka jingstad teknoloji kum ki print & electronic media, internet lane ki mobile phone, khnang ban kyntiew shuh shuh ïa ka pule ka puthi jong ki khynnah.
Kum ban shu pynkynmaw ba ka Jan Bhagidari kadei ka jingïashim bynta shitrhem jong ki paidbah ha kaba ïadei bad ka pule ka puthi. Ha kane ka sngi ka la don ruh ka jingïakop ha ka Recitation bad Teaching Learning Materials Competition.
Ïa ka jingïakop recitation la phiah ha ki ar bynta kata ha ka ktien Khasi bad ha ka ktien Phareng, U Balamkupar Marthong na Langja Govt. LP School U la jop ïa ka 1st Prize, ka Toaikanri Hoojon na ka skul Run Thabah Memorial LPS Pariong ka la jop ïa ka 2nd prize bad ka Santulabon Khardiengngan na ka Rev. S. Wollington Memorial LP School ka la jop ïa ka 3rd prize.
Ha ka jingïakop recitation ha ka ktien Phareng u Mebantei Lyngdoh Peiñlang na ka Wisdom LP School, Pariong U la jop ïa ka 1st prize, ka Rishwaïaka Jyrwa na ka Little Star English Medium Secondary School, Nongbah Bynther ka la jop ïa ka 2nd prize bad ka Seraphinia Marngar na St. Joseph Secondary School ryngkat bad ka Risabiangpor Syiemlieh na Mairang Vidya Jyoti Inclusive School ki la jop ïa ka 3rd prize.
Ha ka Teaching Learning Materials Competition, ka Mairang Vidya Jyoti Inclusive School ka la jop ïa ka 1st prize bud sa ka Skul Little Star English Medium Secondary School Nongbah Bynther ïa ka 2nd prize bad ka Byrki Govt LP School ïa ka 3rd prize.
Kiwei pat ki nongkren kiba la ai jingkren ha kane ka sngi, ki kynthup ïa I Joiñt Director of School Education and Literacy & District Mission Coordinator, SSA West Khasi Hills District, Kong. R. Kongwang, I State Pedagogy Coordinator SEMAM SSA Kong. W.Lynrah bad I District School Education Officer, West Khasi Hills District, I Kong. L.Syiemlieh I ba la ai ïa jingkren pynkut ïa kane ka prokram ha kane ka sngi.
