Shim bynta ki shipai ba dang pyndep training ka Assam Regiment ha ka jingïaid parade

Shillong, Jylliew :Ka tnat shipai Assam Regimental Centre, Shillong ka la pynlong ïa ka ‘attestation Parade’ na ka bynta ka tnat shipai jong ka batch kaba 336 hapoh kane ka Centre ha Shillong ha ka 4 tarik mynta u bnai.
Baroh ki don 68 ngut ki dkhot bathymmai jong kane ka tnat shipai ki ba la ïashim bynta ha kane ka jingïaid parade ba la pynlong hapoh Parson Parade Ground. Ha kane ka jingïaid parade la ïa don lang ruh u Lt Gen KC Panchanathan, AVSM, GOC 101 Area.
Kane ka jingïalang ka long shibynta ban lehkmen halor ka jingpyndep ka jong ki ïa ka jingai jinghikai (training) hapoh kane ka Centre.Kine ki shipai kin ai ka jingshakri hapoh ka tnat shipai Assam Regiment ha ki jaka bapher bapher.
U Lt Gen KC Panchanathan, AVSM, GOC 101 Area, u ba la bishar ïa kane ka jingïaid parade u la ai ka jingïaroh halor ka jingshakri ka ba kane ka tnat shipai ka la ai na ka bynta ka ri bad ka jingnoh synñiang jong ka Assam Regiment na ka bynta ka ri bad ha ka thaiñ shatei lammihngi.
Da ka ba ai ka jingïaroh ïa kane ka kynhun namar ka jingtbit ka jong ki, na ka liang une u heh shipai ua la kyntu ïa kine ki riewïaleh na ka thaiñ shatei lammihngi na ka bynta ban ai ïa ka jingshakri ka ba bha tam.Da ka ba ïashim bynta ha ka jingrwai jong kane ka tnat shipai, kine ki shipai khynnah ki la pynpaw ïa ka jingkmen halor ka jinglah ka jong ki ban pyndep ïa ka thong ban long kita ki shipai ki ba tbit.Kane ka long katkum u kyrwoh lyngba u Sreeprakash, Wing Commander, PRO Defence , Meghalaya.