Shim bynta ki samla pule Khasi ban thang mombati halor ka jingshah siat ïap ki Khasi ha Mukhroh

Nongpoh, Naiwieng 24: Da ki spah ngut ki samla pule Khasi kiba pule ha RIST bad USTM Baridua, Khanapara ha ka janmiet ka sngi Balang ki la shim bynta ban thang mombati bad wah ïa ki Lama ïong ban pynrem jur halor ka jingshah siat ïap haduh 5 ngut ki Khasi ha Mukhroh, Block I ha West Jaintia Hills ba la thombor da ki Pulit ka Assam.
Ha kane ka jingthang mombati la shim bynta da ki samla pule kynthei bad shynrang ban phah ruh ka jingsngewlem sha kiba haing hasem kito kiba la duh noh ïa ki baieit bathoiñ bad kumjuh ruh ban dawa ba ki dei ban ioh ïa ka jingbishar bahok halor kane ka jingshah thombor ha ki Pulit ka Assam.
Kane ka dei jingthang mombati la pynlong da ka KSU, RIST-USTM Unit ha ka jingïalam u President, u Samla Calvin Thongni bad la shim bynta da baroh ki samla pule Khasi.
Kumba la kren da u Samla Calvin Thongni, nongïalam ka KSU, RIST-USTM Unit, ki la pynpaw ka jingsngewsih kaba khraw halor katei ka jingjia ha Mukhroh, ha kaba haduh 5 ngut ki Khasi ki la duh ïa la ka jingim, tang na ka daw ka jingthombor ki Pulit ka Assam.
Ki la buh ruh ka jingdawa ban pynthikna ïa ka jingbishar bahok kitei kiba la duh noh ka jingim bad ka sorkar ka dei ban pyrkhat kyrpang ïa ki ba haing ha sem jongki.
Ha kajuh ka por, ki la buh ïa ki jingduwai kyrpang na ka bynta ka mynsiem jong kito kiba la khlad noh bad kumjuh ruh ki la dawa ba kum kine ki kam thombor ki Khasi ba shong ha ki khappud kim dei shuh ban mad bad lada dang jia nangne shakhamt ka sorkar ka hap ban shim ïa ka jingkitkhlieh, u la bynrap.