Shillong, Jylliew, 26: Ka Mawkynroh Umshing Police Outpost ha ka taïew ba ladep ka la pynlong ïa ka jingïaid paidbah ban ïalap pyrshah ïa ka jingpyndonkam ïa ki jingdih pynbuaid bad u drok.
Kane ka jingïaid paidbah ka long kum shibynta ha ka lynti ïaid ïa ka jingrakhe ïa ka International Day Against Drug Abuse and Illicit Trafficking kaba la rakhe ha ka pyrthei shityllup.
Ki khynnah skul na ki 6 tylli ki skul ka thaiñ Mawtawar lem ki seng samla bad seng longkmie Mawtawar Pyllun ki la wan ban ïashim bynta lang bad rah ïa ki plakad ryngkat ki jingthoh ïalap ban ong ’em’ ïa u drok.
La ïashim bynta lang ha kane ka jingïaid ïalap paidbah da ki nongïalam shnong ha ryngkat ki nonghikai na kitei ki skul lem ki bor Pulit kaba long ruh ka khubor ban don ka jingïatreilang ban weng ïa une u jingdih pynbuaid uba la sdang ban ngam ha ki khun samla.
La kaweh lama ban sdang ïa ka jingïaid ïalap da u Officer in-Charge ka Mawlai Police Station, Bah B. Shabong uba la kyntu ïa ki khynnah skul bad ïa ki samla ban long kiba skhem jingmut ban ong ’em’ ïa une u jait jingdih uba wanrah ka jingïapait ïapra ym tang ha ki longïing longsem hynrei ha ka imlang sahlang.
