Nongstoiñ, Ïaiong 01: Ki khynnah jong ka JNV Nongstoiñ West Khasi Hills Distict ha ka sngi thohdieng, ki la ïoh ban ïa shim bynta ha ka prokram Pariksha PeCharcha lyngba ka live streaming, ïa kaba la pynlong ha Talkatora (Stadium) New Delhi. Ki khynnah ka skul JNV ki la ïa shim bynta ki long kumba 320 ngut ei ei ryngkat bad ki nonghikai.
Kane ka prokram ka la long shisha kaba la ai jingmyntoi bad ai mynsiem eh ïa ki khynnah, kiba dang pynkhreh na ka bynta ka Board Exam jong ki, ban pyllait ïa ki na ka jingkhia jingmut bad ki jingkhuslai kiba ki ju ïakynduh ha ka por exam jong ki.
Baroh ki khynnah kim dei ban sngew marwei, hynrei ki kmie ki kpa, ki nonghikai bad ka imlang sahlang, ki hap ban ïatrei ban weng ïa ka jingeh ne jingtieng ha kaba ïadei bad ka exam, ki dei ban pynshlur ïa ki khynnah bad ban ai ka jingkyshan.
Kumjuh ruh u Prime Minister u la ai mynsiem ba ki dei ban tur shaphrang ban ïaleh tyngeh ïa ka exam jong ki bad ba kim dei ban pyrkhat bakla da kaba ki leh ïa kino kino ki kam ba kim dei ban leh tang na ka daw jong ka jingkhia jingmut bad ka jingkhuslai.
