Nongstoiñ, Risaw 02: Ka Ministry of Panchayati Raj lyngba ka Ophis treikam jong ka BDO Mairang C&RD Block, mynta ka sngi ka la pynlong ïa ka Special Gram Sabha kaba dei ka jingïalang kyrpang jong ki Dorbar Shnong, kaba long ruh kum shi bynta jong ka jingrakhe ïa ka sngi kha u nongïaleh laitluid ka ri India u Mahatma Gandhi. Ïa kane ka jingïalang la pynlong ha ka shnong Mawkarah Nongkdait kaba hap hapoh ka Eastern West Khasi Hills District.
Ha kane ka jingïalang la wan ban pynher ïa ka Lama lai rong da u MDC ka Mairang Konstitwensi u bah Batskhem Ryntathiang, u ba la long ruh kum u kongsan ha ryngkat ka jingïadonlang ka kong L.R Hynniewta BDO Mairang block, sordar ka shnong Mawkarah ha ryngkat ki paidbah nongshong shnong jong kane ka thaiñ.
Ka jingthmu jong kane ka jingïalang ka long ban pynsngewthuh halor ka jingdonkam jong ka jinglehkhuid bad ban burom ïa ka Mariang bad sa kawei ka long ruh ba ki shnong ki thaw kin long kiba bit kiba biang.
Shuh shuh la pynphuh pynphieng ïa kane ka jingïalang da ki jingrwai, ki jingshad bad ki skit. Nalor kane la ïoh ruh ban thung ïa ki symbai dieng ha phyllaw jong katei ka dorbar hall kaba don ha katei ka shnong.
