Nongstoiñ, Nailar 23: Ha ka sngi balang ba la dep ki nongïalam jong ka Garo State Movement ba la ïalam da u bah Nickman Marak president, ryngkat bad hynñiew ngut kiwei pat ki dkhot bad u bah K.P Pangñiang President ka Hill State People Democratic Party bad katto katne ngut ki dkhot, ki la leit ban ïashimbynta ha ka jingïakhih shong kyllaiñ myngngor ba la pynlong da ka Indigenous People Front of Tripura ha madan Jantarmantar ha New Delhi naduh ka por phra baje mynstep haduh san baje janmiet.
Katei ka kynhun kaba pynlong ïa katei ka jingïakhih ka dei ka ka kynhun jong ki jaitbynriew rit pait na Tripura kaba dawa na ka sorkar India ba kan ai noh la ka jong ka jylla ba pura. Kum ban pynkynmaw ba ka GSMC bad HSPDP, ki la long lypa ki dkhot ba pura jong ka synjuk ki nongdawa jylla, la ka jong kaba la tip kum ka National Federation of New State kaba u Professor Munish Tamang u dei u president.
U bah Nickman Marak Chairman ka GSMC haba ïakren bad u nongthoh khubor lyngba ka telephone, u la ong ba hadien ba la pynkut ïa katei ka jingshong kyllaiñ myngngor, la pynlong ïa ka jingïalang ba lyngkot ha kaba ka jingïalang ka la rai ba kin nang pynkhlaiñ shuh shuh ïa ka jingïadei bad baroh ki kynhun kiba dawa jylla la ka jong, khamtam eh bad ki para jylla barit pait ha ka thaiñ shatei lam mihngi jong ka ri India, kum ka jingdawa jylla Tripraland jong ki paitbah na Tripura, Garoland da ki paitbah Garo, Khasi Jaiñtia State da ki Khasi, Gurkha land da ki Gurkha bad kiwei kiwei.
U bah Marak u la ong ruh ba ka jingïalang ka la rai ban phah da ka memorandum sha u Narendra Modi Myntri Rangbah ka ri, ba u dei ban pynkut noh mardor ïa ka jingïaumsnam ha Manipur bad ban wan rah kloi ïa ka jingshong suk shong saiñ.
Nalorkata u la ong ruh ba ka jingïalang ka phaha ruh ïa ka kyrwoh sngew lem sha baroh ki lanot. Ka kyntu ruh ïa ki nongïalam jong ka Kuki land kaba dei ruh kawei na ki dkhot jong ka NFNS, ba kan ïaleh katba lah ban wad ïa ki lad ki lynti na ka bynta ka jingsuk hapdeng ka saw ka sian.
Ha kaba ïadei bad kiwei pat ki mat ba ka jingïalang ka la ïakut la ïoh ban ïakren bad u bah K.P Pangñiang president ka HSPDP u ba la leit ban ïashim bynta ha katei ka jingïakhih, u la ong ba katei ka jingïalang ka la ïakut ba baroh ki kynhun kiba dei ki dkhot jong ka NFNS, ki hap ban ïa ai jingtip mar kylliang haba ki don kino kino ki mat kiba donkam ban pynsngew sha ka sorkar pdeng lyngba u Myntri Rangbah duh ka ri, khnang ba ki lah ban pynbeit da ki jingïalang na ka bynta ban ïathir ban ïatai bad ban pynsgew ha ki nongïalam ba hakhlieh duh jong ka NFNS. Nalorkata u la ong ruh ka jingïalang da kawei ka jingmut, ki la ïakut ban pynlong sa kawei pat ka jingïalang hapoh ka lama jong ka NFNS ha Tripura ha ka 9 tarik Nailur 2023.
