Shillong, Rymphang 19 : U Symbud Myntri Rangbah ka Jylla, Bah Prestone Tynsong ha ka sngi Palei u la pyntip ha Ïing Dorbar ba palat 96 persen ka bai jaka kaba ïadei na ka bynta ka projek Shillong Western Bypass la dep ban pynbeit da kaba kular ruh ïa kaba sah na ka liang ka sorkar kan shimkhia ban tuklar khlem da ktah ïa ka jingsngew jong ki trai jaka.
Ïa kane u Symbud Myntri Rangbah u la jubab halor ka jingkylli ba wanrah da u MLA ka Sohiong, Bah Synshar Kupar Roy Lyngdoh Thabah ha kaba u la ong ba ha kane ka jingpyntrei don ki jaka kiba la palat sha u pud ba la siew bad kynnoh ba la shu theh kulmar ïa ki jakhlia haduh ba ka la ktah lut ïa ki pyntha kba. Kumta halor kane, u Myntri u la kylli ruh la ka sorkar lane ka NHIDCL kan leh haba ïadei bad kitei ki jaka bym pat siew lane bym pat shim.
“Ïa ka bynta kaba dei bad ka Western Bypass, ka projek ka la ïaid shaid shaid bad ïa ka ishu kaba ïadei bad ka bai jaka ka la poi sha ka 96-97 persen kaba la dep ban pynbeit,” ong u Bah Prestone ha Ïing Dorbar.
Nalorkata, u ong ruh ba kaei kaba u MLA ka Sohiong u wanrah ka lah ban dei bad ki 3-4 persen ei ei ki bynta kiba dang hap ban pynbeit bad sahteng haduh mynta bad don ha kti ki district collector bad don ki bynta kiba la poi sha ki arbitrator ruh.
“Kumta nga kwah ban pyntikna ïa ka Ïing ba ïa kine ki ishu yn sa pynbeit noh khnang ba kan ym don kano kano ka jingktah ïa ki trai jaka kiba ha kawei ka liang ki dei ban myntoi haba ka sorkar jylla ka siew ïa ka bai luksan.”
Shuh shuh u Bah Prestone u ong ruh ba lada don kano kano ka jingujor kaba ki trai jaka ki kwah ka don ka lad ba kin leh kumta namar ki don ki district collector bad kuimjuh ki arbitrator kiban peit ïa kata ka bynta.
