Shillong, Nailar 11 : Ka Mawkhar SC bad ka Langsning FC ha ka jingïalehkai ha ka sngi Palei ki la ïasam mar shi point hadien ka jingïakhaid da kaba ïathep mar shi kol ha ka lympung OC Blue Shillong Premier League (SPL) 2021-22 ha ka jingïalehkai ha madan Third Ground, Polo, Shillong.
Shwa ban mih madan, ka Mawkhar SC ka ïoh 2 point bad don shatrai duh jong ka miej kheiñ point katba ka Langsning FC ka kamai 17 point bad don ha ka kyrdan ba ar. Haba phai ha katei ka jingïalehkai, mar syn sdang baroh ar ki kynhun ki la ïakhun tyngeh bad ñioin beit sha ki kut da ka thong ban pynkhih jar hynrei ym don ba lah ban pyndep ha ka liang ka thep kol.
Katba ki minit ki dang ïaid ka jingïalehkai ka la nang ïathnem ha baroh arliang bad dei ka Langsning kaba la ïoh ban plie pyrda nyngkong ba la thep da u Shano Tariang ha ka minit ba 34 jong ka jingïalehkai bad haduh kaba kut ka kylla step ka la lamkhmat da 1-0.
Haba wanphai sha ka jingïalehkai jong ka kylla miet, ka Mawkhar ka la sdang ban pynkylla ïa ka rukom ïalehkai bad ki la ïatrei shitom khlem da ailad satia ïa ki jingpyrshang thep kol ki rangïalehkai ka Langsning FC. Bad da ka jingïai ïakhun ka Mawkhar ka la ïoh ban pynïakhaid lyngba ka kol ba la thep da u Lyngketlut Myrshiang ha ka minit ba 69 jong ka jingïalehkai.
Lynga katei ka kol ba la pynphai da ka Mawkhar ka jingïakhun ka la nang shongshit bad ïathnem bha, baroh arliang ki la ïakhun tyngeh ban pyntam kol hynrei haduh ba kut ki khlem lah ban thep kol ha kaba ki la hap ban shu hun da kaba ïasam mar shi point.
Lyngba kane ka jingïakhaid ka Langsning FC ka la kamai 18 point na ki 9 sien ïakhun katba ka Mawkhar SC ka dang neh ha ka kyrdan ba phra da kaba ïoh tang 2 point na ki 9 sien ïalehkai. Ka jingïalehkai mynta ka sngi Thohdieng kan long hapdeng ka Mawlai SC pyrshah ïa ka Malki SC ha ka por 4 baje janmiet.
