Shillong, Nailur 18 : Ka jingïaid lynti jong ka Mawlai SC ha ka lympung ïalehkai OC Blue Shillong Premier League (SPL0 2021-22 khlem da mad nam rem na ki 12 sien ïalehkai ka la poi noh sha kaba kut hadien ba ka la mad nam rem da 3-2 kol ha ka Rangdajied United FC ha ka jingïalehkai ha ka sngi Saitjaiñ ha madan Third Ground, Polo, Shillong.
Ha katei ka jingïehlai ka Rangdajied ka la ïoh ban thep kol minit ba 21 minit lyngba ka penalty ba la thep da u Wanlamsuk Nongkhlaw.
U Oresterwell Langshiang u la ïoh ban thep ïa ka kol kaba ar ha ka minit ba 24. Pynban ka Mawlai ka la ïakhun tyngeh ban pynphai kol bad dei ha ka minit ba 26 u Oversharp Iawphniaw u la ïoh ban thep ïa ka shi kol kaba la sdang ban ai mynsiem ïa ka kynhun kaba la ïakhun tyngeh beit triang.
Ha ka jingïalehkai jong ka kylla miet, ka Rangdajied ka la ïoh ban thep ïa ka kol kaba lai tang lyngba u Dibormi Kassar ha ka minit ba 53.
Ka Mawlai ka la ïoh ban thep khatduh ïa ka shi kol lyngba u Kharsahnoh ha ka minit ba 81. Katei ka jingïoh thep ka wan lyngba ka jingshut corner na u Dajiedlang Wanshnong ha kaba u rangap kol ka Rangdajied u khlem ïoh ban bat ïa ka bol ha kti kaba la lait noh bad u Kharsahnoh u la ïoh ban sangeh da ka khlieh shapoh ka jar.
Ha ka sngi ba ar, ka Malki SC kan ïakhun pyrshah ïa ka Shillong Lajong FC kaba dei ruh ka jingïalehkai ba khatduh jong kine ki ar tylli ki team mynta ka samoi. Ka Lajong ka la pynliem ïa ka Malki ha ka leg kaba nyngkong kaba la long ha ka 23 tarik Naitung.
