Shillong, Nailar 05 : Ka Ryntih SC ka la khur jingjop da kaba pynliem da 2-0 pyrshah ïa ka Mawkhar SC ha ka jingïalehkai ha ka sngi Thohdieng jong ka lympung OC Blue Shillong Premier League (SPL) 2021-22 ha madan Third Ground, Polo.
Ïa ki ar kol la thep da u Dawanplielad Myrchiang ha ka minit ba 29 jong ka jingïalehkai bad u Mebankhraw Wahlang ha ka minit ba 80. Kadei ruh ka jingïoh thep kol ba nyngkong jong kitei ki arngut ki player mynta ka samoi.
Ka Ryntih ka la pynliem teng ha ka jingïalehkai ha ka 30 tarik Jylliew ïa ka Mawkhar da 3-1.
Haba mih madan ha ka sngi Thohdieng, ka Ryntih ka kamai 11 point katba ka Mawkhar 2 point bad don sha trai duh jong ka miej kheiñ point. Lyngba katei ka jingjop, ka Ryntih ka la kamai 14 point bad ka la knieh noh ïa ka kyrdan ba lai na ka Rangdajied United FC, ïaryngkat point bad ka Langsning FC hynrei ka Ryntih ka tam ha ka liang ka jingïathep kol.
Haba phai sha ka jingïalehkai, ka Mawkhar ka ïoh shibun ki kabu ha baroh ar kylla ki jingïalehkai hynrei kam lah pat ban pyndep ha ka liang ka thep kol, ha kaba kawei ba ka Mawkhar ka la ïoh bha ka kabu kadei ha ka minit ba 17 lyngba u Justerwell Tham hynrei ka bol ba u la khyrwit ka dei noh ïa u dieng kol.
Ka jingbakla ha ka rukom ïalehkai jong kiba shadien ka la plie lad ïa ka Ryntih ban ïoh thep kol, kaba la wan lyngba ka jingshut corner. Ka jingïoh corner jong ka Ryntih kadei ka jingbakla pyndei u player ïalehkai dien ka Mawkhar da ka khlieh.
Ha ka jingshut corner ka bol ka la poi shajan u dieng kol ïa kaba u Myrchiang uba la ïoh ha ka kjat u la khyrwit khlem pynlehnoh shapoh kol. Ka jingïalehkai ha kaba kut jong ka kylla step ka Ryntih SC ka la lamkhmat da 1-0.
Mar syn sdang ka kylla miet, ka jingïalehkai ka la nang ïathnem ha baroh arliang. Ka Mawkhar ka la dei ban ïoh pynïakhaid hynrei u referee u khlem ai ïa ka penalty, kaba la pynlong ïa ki rangïalehkai ka Mawkhar ban khñium bad bitar.
Ka jingïatai halor ka penalty hapdeng ki player bad u referee ka la ïathnem bha ha kaba ka la don ruh ka thma ktien. Bad ha katei ka jingïañia, u Garnoldstar Marbaniang jong ka Mawkhar u la ïoh red card. Katba ki arngut kiwei pat ki player ka Mawkhar ki la ïoh pdiang da ka yellow card.
Kumta ka Mawkhar ka la hap ban ïalehkai noh tang shiphew ngut, hynrei ka Ryntih ka khlem lah thep kol tad haduh ba u Wahlang un thep ïa ka kol kaba ar ha ka minit ba 80 bad ka kynhun ka la pynliem syndon da 2-0.
Mynta ka sngi ka Saitjaiñ ka jingïalehkai kan long hapdeng ka Malki SC kaba kamai 4 point pyrshah ïa ka Langsning FC kaba kamai 14 point ha ka por 4 baje janmiet. Ka Langsning ha ka leg kaba nyngkong ka la pynliem da 4-0 ïa ka Malki.
