Shillong, Nailar 07: Ka Mawlai ka la sdang ïa ka jingïalehkai jong ka ha ka rukom kaba khlaiñ da kaba pynjemkhnap ïa ka Sawmer da 6-2 kol ha ka jingïakhun kaba ar jong ka Shillong Premier League 2025 ha madan First Ground-SSA Stadium, Polo, hynne ka janmiet jong ka sngi Palei.
U Ricky Chyne (17’), u Kevin Rymbai (18’, 57’P), u Balajied Syiemlieh (23’) bad u Robert Khongriah (49’, 81’) ki la pynïoh ïa ka Mawlai ïa ka jingjop ha ka rukom kaba shongkun watla kam shym la long kaba paka ha kaba u Enestar Malngiang (68’, 79’) u la pynkhihjar ar sien na ka bynta ka Sawmer.
Haba phaidien, ka Sawmer ka la shah pynliem ar sien ar wat ha ka Mawlai ha ka SPL 2024 hynrei da ka jingïapher kol kaba duna. Haduh kaba kut, ka Mawlai ka la ïoh mad ïa ka samoi kaba kham seisoh, da kaba pyndep ha ka kyrdan kaba ar, katba ka Sawmer ka la shu lait da ka said na ka thup ki kynhun ba shah sloit ban wan ha ka kyrdan ba phra.
Watla baroh arliang mamla ki la ïaid lyngba katto katne ki jingpynkylla ha ka kynhun shuwa kane ka samoi, hynrei ka Mawlai ka la paw kum ka kynhun kaba khlaiñbor da kaba lamkhmat haduh 3-0 tang hapoh 23 minit bad ka la pynjlan ïa ka kol lamkhmat da 5-0 kol shuwa ba ka Sawmer kan ïoh pynphai ïa ka kol kaba nyngkong.
Ka jingïalehkai ka long kaba stet bad kaba itynnad hynrei ka la shim por tang katto katne minit shuwa ba ka Mawlai kan pynkhih ïa ka kol kaba nyngkong lyngba u Ricky, kaba dei ruh pyrshah ïa ka kynhun barim jong u ha ka minit kaba 17.
Tang hadien shi minit u Kevin, uba khlem artatien ba un long u nongïalam jong ka Mawlai ha kane ka samoi, u la thep ïa ka kol kaba ar bad nangta u Balajied u la pynbud ïa ka kol kaba lai ha ka minit kaba 23, kaba la nang ban khia shuh shuh ïa ka Sawmer.
Haduh kaba kut jong ka kylla step ka kol ka sah 3-0 bad kane ka dei artad ba ka Mawlai ka la sdang ban pynkham jai jai ïa ka jingïalehkai jong ka. Hynrei kim shym la pynlut por ha ka kylla miet, ha kaba u Robert u la pynkhih ïa ka kol kaba saw ha ka 49 minit shuwa ba kan pynjlan ïa ka kol lyngba ka penalty ha ka 57 minit, kaba la pynrung da u Kevin.
Hadien nangta u Enestar u la pynkhih ar tylli ki kol ba marïabud na ka bynta ka Sawmer ha ka 68 bad 79 minit. Hynrei tang hadien 2 minit ka jingbakla shadien ka la plie lad ïa u Robert ban thep ïa ka kol kaba ar jong u bad ban pynskhem ïa ka jingjop da 6-2 kol na ka bynta ka Mawlai.
Yn nym don jingïakhun haduh ka 12 tarik u Nailar ha kaba ka Langsning kan ïakhun pyrshah ïa ka Mylliem ha ka por 5:30 janmiet. Ka jingïakhun hapdeng ka Rangdajied United pyrshah ïa ka Shillong Lajong kaba la buh ban long ha ka sngi Saitjaiñ, la pynkynriah noh da ka jingkyrpad jong ka Rangdajied namar ba ki don bynta ha ka Durand Cup 2025 kaba dang ïaid shakhmat.
