Shillong, Nailar 24: Ka Langsning ka la wanrah ïa kawei na ki jingïalehkai ba ka la tehlakam bun shah ïa ka bol ban pynjemkhnap ïa ka Rangdajied United haduh 4-0 ha ka jingïakhun jong ka lympung Shillong Premier League 2025 kaba la long ha ka sngi Saitjaiñ ha madan First Ground-SSA Stadium, Polo.
U Nelson Rymbai (6’), Damonlang Pathaw (27’, 44’) bad u Dajiedlang Wanshnong (64’) ki la pynkhih ïa kine ki kol na ka bynta ka Langsning bad ka jingjop ka la kyntiew ïa ka kynhun sha ka kyrdan ba lai ha ka miej.
Baroh ar tylli ki kynhun kim shym la jop ïa ki jingïalehkai ba sdang jong ki, ha kaba ka Langsning ka la ïakhaid da 1-1 bad ka Mylliem katba ka Rangdajied ka la ïakhaid ha ka jingïalehkai kaba khlem don ba lah pynkhihjar (0-0) bad ka Shillong Lajong.
Ka jingduna bad ka jingbym lah thep kol ha ki ar tylli ki jingïakhun ka mut ba ka Rangdajied kam shym la lah ban pynkhihjar ha ki 180 minit ba ka la ïalehkai ha kane ka samoi.
Ka kol kaba u Nelson u la thep ka long kadei kaba la pyrshang na jngai kaba u nongapkol ka Rangdajied u Meshan Banjop Sumer um shym la lah ban leh eiei. Ka Langsning ka la bteng ban wanrah jingeh ïa ka RUFC bad sa shisien ka la lah ban pynshitom ïa ka liang pyrshah namar ka jingbym lah ban pyrkhing bad pahara bha shadien, kaba la ailad ïa u Damonlang ban thep tiak da ka khlieh ïa ka kol kaba nyngkong jong u mynta ka samoi bad ban pynjlan ar kol na ka bynta ka kynhun ha kane ka jingïalehkai.
Ha kawei pat ka liang u kapten ka Langsning u Atlanson Kharmaw u la leh bha ban pynlait ïa ka jingma kaba shyrkhei da kaba pyllait ïa ka bol na u laiñ hadien katto katne minit.
Ki la don ki khep ba ka kynhun ki rangapdien jong ka Langsning ki la mad katto katne ki jingduna hynrei ki la lah ban khanglad ïa ka RUFC bad, tang shuwa ban kut ka kylla step, ka Langsning ka la ïoh ïa ka kol kaba lai, hadien ba u Chusrang Sangma u la buh ïa ka bol na ka bynta u Damonlang ban leh ïa kaba donkam.
Ka Rangdajied ka la sei lut ïa ka bor ban pynkylla ïa ka jingïalehkai ha ka kylla miet bad ba ki la ïoh katto katne ki lad ki kabu. Hynrei ka jingpyrshang kaba thikna ka la duna bha na ka bynta ka RUFC ha katei ka sngi, ha kaba ki jingpyrshang pynkhihjar jong u Everson Malieh, u Benny V Khriam bad u Deepson Tokbi baroh ki la lait baroh sharud. Wat ka bok ruh kam shym la don ha ka liang jong ki hadien ba ka jingpyrshang thep na ka free kick la khanglad da u dieng kol.
Ka Langsning ka la pynkhihjar biang ha ka kylla miet lyngba ka bol pashat na liang kadiang bad la thep da u Dajiedlang Wanshnong. Kane ka dei ka kol kaba paka tam kaba u lah ban pynkut noh ïa ka jingïashim bynta jong u ha kane ka jingïalehkai namar ba ula shah pynshong ben noh hadien kane.
Ka Langsning mynta ka la kamai 4 point na ki ar tylli ki jingïalehkai, katba ka Rangdajied ki don ha ka kyrdan kaba ym shym la khmihlynti, ha ka kyrdan kaba phra da kaba kamai tang 1 point naki ar sien ïalehkai.
Ka SPL 2025 kan bteng biang ha ka 27 tarik Nailar ha kaba ka jingïakhun kan long hapdeng ka Laitkor bad ka Mylliem ha ka por 4:30 baje janmiet.
