Shillong, Nailar 22: Ka Shillong Lajong, kaba bat ïa ka nam lahduh, ka la khur ïa ka jingjop kaba paka da kaba pynliem haduh 5-0 kol ïa ka Malki ha kawei na ki jingïalehkai jong ka Shillong Premier League 2025 ba la long hynne ka sngi Thohdieng ha madan SSA Stadium- First Ground, Polo.
Ka Lajong ka la lah ban tehlakam naduh ba ka la pynkhih ïa ka kol kaba nyngkong lyngba u Mebannangkiew Thabah (31’) shuwa ban pynbud sa saw tylli ki kol lyngba u Emanbha Marbaniang (39’, 51’), u Ribor L Lyngkhoi (47’) bad u Firstborn Khongsit (84’).
Shuwa kane, ka Malki ka la jop ïa ka jingïalehkai ba nyngkong pyrshah ïa ka Laitkor da 1-0 katba ka Lajong ka la ïakhaid khlem don ba lah pynkhihjar bad ka Rangdajied United.
Kumta ka Lajong ka la thrang dik dik ban ïaid shakhmat ban ïada ïa ka nam lahduh da ka jingjop bad ka la lah ban leh ïa kane da ka jingjop kaba shongkun ha kane ka jingïakhun, kaba la ïohi ïa ka Lajong ba ka la synshar ïa baroh kawei ka jingïalehkai.
U Franklin Surong, uba la long u namtam na ka bynta ka Malki pyrshah ïa ka Laitkor, u la pyrshang katba lah hynrei ka Lajong ka la long ka kynhun kaba kham pher. U la lah ban khanglad da lai tylli ki save kiba bha ha kaba sdang jong ka jingïalehkai.
Ka jingjop ka la kyntiew ïa ka Lajong sha ka kyrdan ba-ar ha ka miej da kaba ïoh 4 poiñ, hadien ka Nangkiew Irat (6 poiñ). Ka Malki ka dei kawei na ki lai tylli ki kynhun kiba kamai mar 3 poiñ, kiwei pat ki dei ka Sawmer bad ka Mawlai.
Ka jingïakhun ha kane ka sngi saitjaiñ (23 tarik Nailar) kan long hapdeng ka Langsning bad ka Rangdajied United ha ka por 4:30 baje janmiet.
