Shibnai khlem ïoh khaw rashon ha kylleng ka thaiñ South West Garo Hills, kynnoh kiba sam khaw

Shillong, Naitung 28: Ka seng jong kiba sam khaw rashon ne ka Dealer Association na Ampati ka la thoh sha ka sorkar jylla halor ka jingbym poi jong u khaw rashon na ka bynta u bnai Naitung ha kylleng jong ka South West Garo Hills.
Ha ka shithi, kane ka association ka la ong, ba ym don kiba sam khaw ne kiba dielang kiba la pyndep ïa ka jingsam khaw kaba shibnai khamtam ha une u snem. “Kane ka la lam sha ka jingkulmar bad ka jingeh na ka bynta baroh ar ki FPS (fair price shop) dealer bad kiba ïoh jingmyntoi, kiba la wanjngoh ïa ki dukan rashon manla ka sngi da ka jingthmu ba kin ïoh ïa u khaw kumba la bhah ne mang,” ong ka shithi.
Wat hapdeng ki jingïai buddien bad ki jingtohkit kam shym la don ka jingïakren ne ka jingbatai na ki nongsam bad kiba die lang. “Kane ka jingduna ka jingbym shai ki rukom treikam bad ka jingïasyllok lang ka la ktah ïa ka jingïaid beit ka rukom sam khaw sha ki paidbah ne ka Public Distribution System (PDS) bad ka pynsniew dur ïa ka jingshaniah ki paidbah ha kane ka rukom treikam,” bynrap ka association.