Shillong, Ïaiong 26 : Ka sorkar jylla haduh mynta ka khlem pat pyllait shi tyngka ruh sha ki District Council na ka bhah kaba 59 klur tyngka ba la ai da ka Ministry of Finance jong ka sorkar pdeng kyrpang na bynta ban pynbha ïa ki jaka sumar ha ki lai tylli ki ADC ba don ha ka jylla.
Da ka jingsngewkhia halor katei ka jingleh jong ka sorkar jylla, na ka liang u MDC ka Mawhati, Bah Charles Marngar u la ong ba shen kin sa leit ban pan jingshai na u Myntri Rangbah ka jylla bad ruh na u Myntri ba dei peit ïa ka District Council halor katei ka bynta.
“Tang ha u snem 2021-2022 ka pisa ba ka sorkar pdeng ka pyllait ka long 59 klur. Ha ka jingshisha na ka liang jongngi, ngi la sngewkmen bha ba ka don ka skim kaba wan na ka sorkar pdeng na bynta ban pynbha ïa ki jaka sumar,” u la ong haba kren bad ki lad pathai khubor.
Katkum ka jingong jong u, ka sorkar pdeng ka la mang haduh 6.05 klur na bynta ki Sub Centre, nangta 6.04 klur tyngka sha ki PHC, nangta 9.25 klur na bynta ki public health unit, nangta ka jingkyrshan pisa na ka bynta ki jaka sumar bym biang ki jaka treikam kaba long 3.21 klur.
U la ïathuh ruh ba ka don ka jingkyrshan pisa kaba la mang 9.29 na bynta ban kyntiew kyrdan ïa ki PHC bad ki Sub Centre ha ki nongkyndong sha ki Health and Wellness Centre. La ïathuh ruh ba la mang 1.51 klur na bynta ki Urban Primary Health Care Services (UPHCS ), nangta sa ka jingkyrshan pisa ïa ki Urban Health and Wellness Centre kaba ha Meghalaya la mang 23.30 klur tyngka.
“Hynrei sngewsih ba ka sorkar jylla ki mut ban ym ai ïa kane ka skim. Nga la kren ha Ïing Dorbar ruh ban wad jingtip halor kane ka skim namar ïa kane ka skim la pyllait naduh ka 30tarik u Naiwieng 2021. Mynta la dei ka snem 2022 bad ka la dei ban wan sa ka skim 2022 – 23. Ïa kane ka skim ka sorkar pdeng ka la pynmang haduh u snem 2025-2026. Ha ka jingshisha ka la dei ban long ka jingkyrkhu hynrei haduh mynta ka sorkar kam pat pyllait satia,” u la bynrap shuh shuh.
U Bah Charles u la ong ruh ba ha ka jingshisha ka Ministry ka la dep kdew ba ïa katei ka pisa dei ban pyllait hapoh ka 10 sngi bad lada bakla ïa kata ki dei ban phah lang bad ka sut hynrei na ka liang ka sorkar haduh mynta jar jar kam pat pyllait satia.
