Shi taïew shuwa ka sngi thep vote, ngin sa sngewthuh kham shai katno ngin jop : Metbah

Mairang, Rymphang 06: U Bah Metbah Lyngdoh, President jong ka UDP, u la ong ba ka Seng ka la pynïeng kyrtong 46 ngut ha kane ka elekshon MLA 2023 bad haba pynïeng ka Seng ka khmih lynti ba baroh kin jop.
Haba la kylli pat kaei ka jingkheiñ ba ka UDP ka ïoh kiab don jingkyrmen bha ban jop, u Bah Metbah u la ong ba ïa mynta ka dang kham shitom ban ïoh jingkheiñ, hynrei la kumno kumno shi taïew ka sngi thep vote la kumno la kham shai katno ngut kiba don jingkyrmen bha an jop bad ïa mynta hi ka dang eh than.
Ïa kane u Speaker ka Meghalaya Legislative Assembly, u la pynpaw haba ïakren bad ki nongthoh khubor hadien ba u la dep ban thep kyrteng ha ophis DC Eastern West Khasi Hills District ha Mairang.
Ïa u Bah Metbah u ban mih sha lympung na ka bynta ka jingjop MLA ha ka sien kaba saw, la synran lang da ki nongïalam ka UDP Mairang ryngkat kiba bun ki nongkyrshan kiba la ap sha phyllaw ka ophis DC.
Ha kaba ïadei bad ka jingleit biang jong sha ki paidbah ban pan jingkyrshan, u President ka UDP, u la ong ba ki kam kiba u la trei bad leh ha kine ki san snem, ki kren kham jam bad ki paidbah ruh kin sakhi ïa kata bad kin kyrshan biang ïa u kum ka dak ka jingsngewnguh ïa kaei kaba u la leh.
“Ki paidbah kin jied biang ïa nga kum ka da ka jingsngewnguh ïa ki kam kiba nga la leh ha kine ki snem kiba la leit”, u la ong.
Shuh shuh u la ong ba ka kam kaba kham hakhmat kadei ka jingwanrah ïa ki tran treikam bapher bapher naduh ba la plie ïa ka Distrik kaba thymmai, namar ba ki dang don shibun ki kam kiba ka Distrik ka dang donkam, kynthup ruh ïa ki ophis treikam.
Haba pynpaw ka jingsngewskhem mynsiem halor kane ka elekshon ba mynta, u Bah Metbah u la ong ba kaba phylla mynta ka long ba kiba bun kiba ïaleh pyrshah ïa u ha kine ki snem baladep, mynta ki la wan ai jingkyrshan da kaba pynpaw ba kim sngewtynnad shuh ban ïaleh pyrshah ïa u, hynrei ki kwah ban ïatreilang na ka bynta ka roi ka par jong ka Constituency hi baroh kawei.