Jowai, Nailar 16: Ki bor pynïaid jong ka Meghalaya Bharat Scouts & Guides West Jaiñtia Hills shi bynta na ka ‘Azadi ka Amrit Mahotsav’ ne ka lyngkhuh snem ba 75 snem ka ri, kala pynlong ïa ki prokram bapher bapher shi taiew lynter kata naduh ka 8 tarik haduh hynnin ka sngi (Muchai) 15 tarik Nailar 2022.
Hapoh kine ki sngi la pynlong ïa ki jingïakop naduh ka Drawing-Painting, Slogan Writing, Essay writing, Dancing, Singing, Quiz, Debate, Extempore Speech halor ka phang jong ka Azadi Ka Amrit Mahotsav ba la ïashim bynta shong shit da ki khynnah Scout-Guide na ki skur bapher bapher.
Ïa kane ka taïew lehkmen la pynkut hynnin ka sngi ha District HQ. MBS&G West Jaiñtia Hills hapoh ka jingpynïaid u Adiam U Bthuh, Jt. District Secretary MBS&G ha ryngkat ka jingdonlang ka S. Tariang, District Commissioner Guides kum ka kongsan, u Hopeful Khongstia, District Treasurer MBS&G nalor ki Rovers-Rangers, Scout Master bad kiwei de ki Guide Captain.
Ka kong S. Tariang haba kren ha kane ka sngi ka ong ba ka jingrakhe ïa ka Independence Day Celebration mynta ka snem ka long kaba kyrpang eh namar ka jingïoh laidluid ba 75 snem pura na ka jingshah shynshar donbor jong ka sorkar phareng, kumta ka kyntu ïa ki nongshong shnong ba mynta ba kin don ka jingkitkhlieh na ka bynta ka Ri bad ka Jaitbynriew.
Ha ka juh ka por ka ai jingkyntu kumjuh ïa ki khynnah Scout-Guide da kaba ong ba ka pyrthei ka khmih lynti ha ki khynnah na ka bynta ka lawei, kum ki khynnah ki dei ban long kiba kiba tip sngi bad mihnot thop ha kino kino ki bynta jong ka jingim khnang ba kin long ka lawai ba phyrnai.
Ha kane ka sngi pynkut ïa ka taïew lehkmen la sam ruh ïa ki Momento sha baroh ki Scouts-Guide kiba la jop ha ki jingïakop bapher bapher bad la ïoh ki kyntien ai khublei na ka kong Dolly Lamare, Unit Leader Jowai Open Unit.
