Shi taïew ai por ka KSU bad ki paidbah ka thaiñ Ranikor ban pynkylla ïa ka rai ai jaka shipai

Mawkyrwat, Nailar 20 : Ka KSU South West Khasi Hills District mynta ka sngi 20/08/2025 ka la hiar sha Photkroh ban pynlong da ka jingïalang paidbah kum shibynta ban pyrshah iaka jingthmu jong u syiem lem bad katto katne ki dkhot ka Executive Durbar Hima Maharam ban ai sha ki shipai kumba 70 Acres na ka bynta ban shna ïa ka Unit Headquarter jongki BSF ïa ki jaka rep ha Photmula kaba don ha South West Khasi Hills District.
Ha kane ka sngi la wan ban ïasnohkti lang da ki spah ngut ki paitbah ha ka jingïadonlang jong ki nongïalam sengbhalang bapher bapher naduh ka SSSS, HANM, HITO bad HNYF. Nangta la ïadon lang ruh ha kane ka sngi da ki Nongïalam ka Seng Samla Kur Syiemlieh Sawkpoh, Ranikor Area Farmers Association, Synjuk ki khun ki Hajar ka Hima Maharam Dong Border, ki Myntri shnong bad kiwei kiwei.
U bah Forwardman Nongrem, uba dei u President jong ka Khasi Students Union jong ka South West Khasi Hills District u la pynrem jur ïa ka jinglong bad leh mutlop bad leh donbor jong u Syiem ka Hima Maharam Syiemship lem bad katto katne ki Myntri Hima da kaba ai por ruh shitaïew ban lum ïa ka Durbar Hima bad pynpaw ïa ka rai ba la weng noh ïa kane ka jingthmu lem kumta, u la ong ba ki paitbah bad ki khun ki hajar ka Hima Maharam kin sa leh ïa kaba donkam. U la ong ruh ba kumno u Syiem u ong ym don jaka ban rep ban riang ne ban sah ki khun ki hajar katba ka jaka ka don pat ban leit ai ïa ki shipai haduh 70 acres.
Ym tang kata, u bah Nongrem u la kynthoh ruh da kaba ong ba mynshwa ki syiem ki ïaleh ban pynïar ïa u pud u sam Hima hynrei une u Syiem ba mynta pat u ïaleh ban die duh ïa ki jaka na ka bynta ka spah ka phew ba shipor. U la ong ruh ba ka KSU kam pdiang ïa ka jingpynthame u syiem da kaba ong ba kane ka dei na ka bynta ka ïohkam ïohjam ne kata ka bai lutksan da kaba buh jingkylli ruh ba hato ïohi seh ba kiba bun ki dei ki nongtrei khasi ha ki jaka shipai kum ha Upper Shillong, Mawshbuit bad wat ha Gumaghat Border Out Post ruh.
Shuh shuh u la ong ruh ba ka jingong u Syiem ban ai compensation ka dei tang ka kam kai namar ngin nym lah ban ïapein ïa ka pisa ba shipor bad ka lawei jongki khasi khara bad ki khun ki hajar ka Hima Maharam. “Ka jingkyllaiñ u Syiem lem bad ki katto katne ki dkhot ka Executive Durbar Hima ka la paw shai ba watla ki la tyrwa 2/3 tylli ki jaka sha ki shipai phewse kim long shai ne ïathuh haei kita ki jaka kaba pyni ba kane ka dei ka buit sop sop sha lyndet jong u Syiem bad katto katne ki dkhot ka Executive Durbar Hima”, ong u bah Nongrem.
Ha kawei pat ka liang u Presiden ka KSU u la ong ba ka jingdon ka ophis treikam u Syiem ha Photkroh ki dang pyrkhat ka dei na ka bynta ka jingshngaiñ ki khun ki hajar bad ka Hima ne kan dei kata ka jaka ban sngap ïa ka jingud jingnam ki khasi ba shong ba shah ha Maharam phewse kaba paw mynta i kumba ka dei ka karkhana shna pisa jong u Syiem bad ki katto katne ki ñiangkohnguh kiba dei ki nongbud jongu.
Namarkata, lah ban kdew ba kane ka jingïalang ha Photkroh ka dang dei tang ka jingsdang bad lada u Syiem bad ki briew jong u ki leh bym patiaw ai ki paitbah bad ki khun ki hajar ka Hima Maharam kin shim ïa ki rai bad ki sienjam ba tyngeh nangne shakhmat.