Mawkyrwat, Naitung 17: Ka ophis jong u District Disaster Management Authority (DDMA) ha ryngkat ka jingïatreilang bad ka Meghalaya Administrative Training Institute (MATI) ka la pynlong ïa ka jingai jinghikai kaba shisngi halor ka “Disaster Resilience in Agriculture hapoh ka Multipurpose Hall, DC Office Laitlawsang, South West Khasi Hills District.
Ka jingthmu ba kongsan jong kane ka jingai jinghikai ka long ban pynsngewthuh ïa ki nongrep shaphang ki jingshah ktah ha ka rep ka riang bad ki jingshah ktah jong ki, ïa ka jingpynbiang marbam, ban kyntiew ïa ka jingsngewthuh shaphang ki rukom rep kiba lah ban ïaleh pyrshah ïa ka jingkylla ka suiñbneng bad kiba lah ban neh, ban tei ïa ka bor halor ki skhim sorkar kiba la don lypa bad kumno ki lah ban kyrshan ïa ki nongrep kiba shah ktah ha ki jingjia ba sngewsih, ban pynkhlaiñ ïa ki Agriculture Field Officers ha ka rep ka riang ha ka jingpynkhreh ha ka kyrdan jong ka imlang sahlang na ka bynta ki jingjia ba sngewsih, ban pynïasoh ïa ki nongrep ha kaba thaw ïa ki plan ban ïakhun pyrshah ha ka kyrdan shnong lyngba ki kam ba ïashimbynta lang.
Ha kane ka prokram, u Dr. E.S. Langsiang, District Disaster Management Officer (DDMO), South West Khasi Hills District u la long u nongai jinghikai bad uba la ai ruh ki jingkren pdiang burom ryngkat ka jingïathuh lyngkot shaphang ki jingthmu jong ka prokram bad u la pynksan ïa ka jingdonkam ban pynïasoh lang ïa ka jingpynduna ïa ka jingma na ki jingjia ba sngewsih ha ka liang ka rep ka riang, khamtam ha ka jingshai jong ka jingkiew jong ka Meghalaya ha ki jingjia ba sngewsih kiba ïadei bad ka jinglong ka suiñbneng.
Ki phang ba ki la ai jingpynshai ha ki paidbah nongrep ki long ka jingpynsngewthuh ïa ki jingma bad ki jingshah ktah ha ka rep ka riang ba la ai jingpynshai napoh ka ophis jong u District Disaster Management Officer (DDMO), ki rukom rep kiba kum ka juk stad bad kiba lah ban shah ïa ka jinglong ka suiñbneng ba la ai jingpynshai na ka Agriculture Department, ïa ki Skhim bad ki rukom kyrshan jong ka sorkar ba la pynshai na ka Agriculture Department bad DDMA kiba kynthup ïa ka PMFBY (Pradhan Mantri Fasal Bima Yojana), ka Agromet Advisory Services, bad ka Relief Assistance and Contingency Crop Planning.
Nangta, ka bynta jong ki ophisar rep & ki kynhun nongrep ha ka jingpynkhreh ba la ai jingpynshai na ka Agriculture Department Expert, bad ka bynta ba khadduh ha kane ka sngi ka long ka jingpynsngewthuh ïa ki jingtrei ryngkat ka jingïashim bynta – ka jingpynkhreh ïa ka Plan lyngba ki Shnong ba la pynshai lyngba ka ophis jong District Disaster Management Authority (DDMA).
Lyngba kine ki lad ai jinghikai, na ka liang ki nongrep ki la ïoh shibun ki jinghikai bad ym tang kata ka la long ka jingkyrkhu na ka bynta jong ki ha kaba kumno ki nang lah ban pyntyllun ïa ki kam ha ka rep ka riang wat hapdeng ki jingeh kiba bun.
