Shi miet shi miet pynkylla Ri Kynti u Syiem Hima Khyrim ïa ka Ri Raid ha Raid Shabong

Shillong, Risaw, 09: Ki Khun ki hajar jong ka thaiñ Pynurlsa kiba hap hapoh ka Raid Shabong ki la pynpaw ïa ka jingbynñiaw halor ka jingleh donbor jong u Syiem ka Hima Khyrim u Dr. Balajied Sing Syiem ban pynkylla shimiet shimiet ïa ki jaka jong ka Raid na ka Ri Raid sha ka Ri Kynti.
Ha ka jingïakren bad ki lad pathai khubor ha ka sngi Balang, u Bah Phrangkupar Thabah uba mihkhmat ïa ka sur jong ki khun ki hajar ka Raid Shabong u la ong ba ka Raid Shabong ka dei kaba heh tam napdeng ki saw Raid ba kynthup ïa ka Raid Mawshun, Raid Lyngkhat, Raid Shabong bad ka Raid Rngad.
“Ïa kine ki Raid la tehsong da ka Saw Raid Act, 1997,” la ong u Bah Thabah.
“Kaba pynlyngngoh ïa ngi ki nongshong shnong jong ka Raid Shabong ba u Syiem ha ka 30 tarik, Jylliew, 2009 hapdeng ka jingdum jong ka miet u la ai ïa ka kot Registration 2009 sha ki Kur Khun Longtrai Lai Kynthei da kaba pynskhem ba ïa ka Raid Shabong la pynkylla sha ka Ri Kynti,” la ïathuh u Bah Thabah.
U la ïathuh ruh ba ïa kane u Syiem u la leh khlem ka jingtip jong ka dorbar Raid ne da u Sordar jong ka Raid Shabong.
Katkum ka jingïathuh jong u Bah Thabah, kumba ka long naduh hyndai hynthai ka Raid Shabong ka dei kaba la rim bha ha ka thaiñ Riwar bad ka la don kumba 100 snem eiei katkum ki dulir bad na ka kot jingpynshisha 1870. Kane ka kot ka ïadei bad ka jinglum khajna jong u Syiem.
“Ngi don sa kawei ka jingpynshisha ba ha u snem 1902 ka la don ka jingïakynduh lang jong ki 25 shnong bad mynta la khot kum ki Saw Raid bad ki ju ïakynduh lang ïa u Hajur Kishor Sing Riwan hapoh ka shnong Pynter ban ïasnoh biang sha ka Hima Khyrim namarba ha u snem 1900 u Hajur Kishor Sing u la kyrpad ïa ki 25 shnong ban ïasnoh biang bad ka Hima Khyrim,” la ïathuh u Bah Thabah.
“Naduh ka 30 tarik, Jylliew, 2009 haduh ka 3 tarik, Nailar, 2024 ha ka jingïalang kaba la long la pyntip paidbah ïa ka jingleh be-aiñ jong u Syiem bad ki nongshong shnong jong ka 14 shnong ki la jied ïa ki rangbah ban ïakhun ïa ka jingleh be-aiñ jong u Syiem,” la ong u Bah Thabah.
Halor kane ki rangbah ba la jied da ki 14 shnong ki la ujor da ka mukotduma ha District Court. “Ngi lyngngoh ba ka hukum ba la pynmih da ka Kashari ha ka 20 tarik, Nailur, 2024 la bthah ban don da ka Status Quo ne ka jingburom mar kylliang ïa ki jaka hapoh ka Raid Shabong bad kan ym don ruh ka jingkam trai lyngba ka Kot 2009 kaba ai be-aiñ da u Syiem hapoh ka Raid Shabong,” u la ong.
U la ong ruh ba ki paidbah nongshong shnong jong ka Raid kim pdiang satia ïa kane ka jingleh jong u Syiem.