Shi har ki jingkylli yn pdiang ki paidbah ka shnong Maweit ïa u Myntri Rangbah ha ka 30 tarik

Nongstoiñ, Nailur, 27: Ki paidbah nongshong shnong nongkyndong ka thaiñ Maweit baroh kawei, ki dap da ka jingsngewkmen shikat-dei eh halor ka khubor ka jingwan buh Maw Nongrim u Chief Minister u Conrad K. Sangma ïa ka surok Nongstoiñ-Maweit kaba 23 kilometer, ha ka 30 tarik mynta u bnai. Ki daw jong ka jingsngew kmen ki long ban ïohi markhmat ïa u Chief Minister bad ka Helicopter kiba ju ïohi tang ha suiñ bad ha ki dur. Kaba ar ka long ba u dei u Chief Minister u ba nyngkong ban wan iuhkjat ha Maweit.
“Kan long ka kabu ksiar ïa ki paidbah Maweit kiba bym ju ïoh lad mynno mynno ruh ban ïakynduh markhmat bad u khlieh duh jong ka jylla, namar ki angnud ban jubab halor ki jingkylli ba ki la pynkhreh ban buh bad ban ïoh jingshai halor ka jingjah rngai noh ka Scheme 2 lane Nongstoiñ-Maweit-Nongjri kaba 75 kilometer bad kiwei ki lad pynroi kiba bun jaid na ki tnad Sorkar, kiba la pynlong ka jingduhnong ïa ki nongshong shnong ka thaiñ baroh kawei”, ong u Bah Tonington Tyrsa Adviser, ka Synjuk ki Nongshynshar Shnong Maweit Area, u ba long ruh ha kajuh ka por u General Secretary ka West Khasi Hills Senior Citizens Association.
Une u nongïalam u la ong ruh, “Ha kaba ïadei bad ki mat ban ïoh jingshai na u myntri rangbah duh, kum ki nongshong shnong ngi la pynkhreh ka jingthoh ban pule markhmat shuwa ban aiti ha katei ka sngi. Hynrei sngewsih ban pynpaw hakhmat ka pyrthei ba yn ym ïoh kum kata ka lad, namar la ïoh jingtip ba ka NPP kan ym pdiang kylluid ïa kiba nabar ban kren ha katei ka sngi”.
“Kum ki riew rangbah ka thaiñ kiba ju kren ne ieng na ka bynta ki kup shilliang sem shilliang ka thaiñ, ngi sngew duhnong shikatdei eh ha kum katei ka por jingwan jngoh u CM ïa ka thaiñ. Kumta, ngi pynpaw lyngba ki lad pathai khubor kiba ju trei na ka bynta ka imlang sahlang, ba un tip ba ki paidbah Maweit ki pan pynshai ba balei bad don daw aiu halor ka jingbym lah ban pyntrei lut ïa ka surok Nongstoiñ- Maweit kaba 35 kilometer (Intermediate Lane) kumba la dep survey. Hynrei mynta pat tang 23 kilometer, kata ruh ym pat ïohi ïa ka jingsdang lano lano ruh”, u la ong.
“Ki paidbah ki kwah eh ban tip ba ka jingbei pisa ka World Bank, yn kheiñ kum ka ram ne shu ai jingïarap ei kumba la pynshai u MLA Nongstoiñ bad ki paidbah ki da kwah ruh ban ïoh jingshai sa na u CM. Ki paidbah ki kwah ban ïoh jingshai na ka sorkar MDA, shaphang ka pisa Royalty Dewiong na ki Challan ba la ishu katkum ka NGT guideline November 2014-May 2017, ki long, 1,77,297 tylli. Ba la dep die 1,64,015 tylli Rs 1,90,00,51,282/- bad kaba dang sah ban die 13,926 tylli, kaba la ïoh lum tang na ka Collection Counter Nongstoiñ, kaba u dewiong u wan tang na ka thaiñ Maweit. Kane ka long katkum ka RTI No. DMR/NGN/2016-17/11 dt 18/7/2018, kaba la pan da ka Synjuk ki Nongshyn-shar shnong Maweit Area”, u la ong bïang.
“Ki paidbah ki kwah ban tip shano katei ka pisa ba kamai hi ka surok Nongstoiñ-Maweit ka jah? bad hap ban da pan pisa nangno nangno, haba la ïohi pylleiñ na ki kot ki sla, katei ka 23.00 kilometer la mang ban pyllut tang Rs 98,26,14,300/-, bad yn bteng biang ban poi shaduh Maweit da kaei pat ?”.
“Ngi kwah tip ïa ka jingbym sngew kwah ka sorkar jylla ïa ka Surok 2 lane kaba na Nongstoiñ-Maweit shaduh Nongjri 75 kilometer, ïa kaba la ïaid shaid shaid ban pynbiang ïa ki kot ki sla bad la tender ruh haduh 3 sien na ka bynta ban ïoh ïa ki Nong survey (Consultants services) ban ïoh ïa ki Details project report (DPR). Ka jingkwah ban ïoh jingshai ka long ruh, la katei ka scheme ka dang im ne ka la jah duh noh syndon. Katkum ka jingshisha, ka dei kawei na ki project kaba ka jaidbynriew ka thaiñ, ka khmih lynti eh, ka ban lah ban pynim ïa ka thaiñ bad ka District baroh kawei, namar yn ïasnoh bad ka iew Border Bangladesh”.
“Ka jingïai bteng ka jingtrei bad kit dewiong be-aiñ hapoh ka thaiñ, kaba la pynlong ïa ka jingnang pynjot ïa ka surok Nongstoiñ-Maweit khamtam ha ka por lyiur, kaba la pynjynjar sat ha ka leit ka wan ki paidbah, katba ka sorkar ka nang len na ka por sha ka por hapoh Assembly. Hato ka dei shisha ki jingbym tip ba don kum kita ki jingjia kum ka sorkar bad ki bor pynïaid District. Ngi kwah ka jingshai na u khlieh duh, namar ki paidbah ki khuslai namar ki jingduh ei ki khajna na ka bynta jong ki”.
“Ngi da kwah eh ban tip halor ka jingaibor ïa ki coke factory ha ki jaka ba don par dewiong, kaba la pynlyngngoh ïa ki paidbah namar u dewiong ban poi sha kitei ki factory kin long beit na Quary dewiong sha ki Coke factory. Ngi kwah ïoh jingshai ba ba mano bad hangno ban siew ïa ka khajna ki ban donkam ki paidbah ne ka sorkar kan khrong beit na ki factory”.
“Ka District Selection Committee (DSC) West Khasi Hills ka la ih naduh u snem 1976, mynta la 45 snem, dang long 0 % ha ka result DSC na kane ka thaiñ baroh kawei wat la, la bun bah ki samla pule kiba la ju ïa pyrshang ïaleh exam DSC. Hato, ka sorkar jylla ka ju don mo ka statistic ne survey kum ïa kine ki jingeh hapoh ka District ne jylla, ban lap ïa ki jingeh ha ki nongkyndong, ba kan long ruh kum ka nuksa ban pynshlur ïa ki samla pule, ne hato kiei ki jingmut jong ka sorkar ha kane ka juk mynta”.
“Ka sur ki longkmie ki longkpa hapoh ka thaiñ, ki dap tang ki jingduh jingkyrmen ïa ka lawei ki khun, haba ki ïohi, ba wat tang ban ïoh rung ha ki skul training Nonghikai ruh kim ïoh lad, kumta kumno kin ïoh ban apply kam Nonghikai ha ki shnong ruh. Kaba kut la shu peitkai tang da ki khmat wat ha ki skul ba la seng ne trei shitom ki kmie ki kpa ruh”.
“Ki jingkwah ïoh jingshai na u CM ba la ka sorkar ka ïohi ne em ïa kum kine ki jingjia ba la jia la kham slem ha kane ka thaiñ bad ki para nongkyndong baroh hapoh ka jylla, kumba la kam hapoh Assembly ba kane ka sorkar kaba bha tam”, ong ka kyrwoh na u Bah T.Tyrsa.